nyhende
Ho er ny konsernsjef i Bremnes Seashore
Linda Litlekalsøy Aase blir ny konsernsjef i Bremnes Seashore-konsernet.
Styret i Bremnes Fryseri AS har tilsett Linda Litlekalsøy Aase som konsernsjef. Det melder selskapet i ei pressemelding fredag.
Aase er utdanna sivilingeniør og bedriftsøkonom, og har lang erfaring frå både maritim og marin sektor.
Ho tar over som konsernsjef etter Olav Svendsen 1. november 2023. Olav Svendsen er hovudeigar og har arbeidd i konsernet i over 50 år.
Under hans leiing har selskapet blitt eit av Norges største privateigde oppdrettsselskap med over 600 tilsette. Selskapet har mellom anna fleire oppdrettslokalitetar i Sveio kommune.
Me gler oss til å få Linda om bord og ser fram til at ho skal vidareføra Olav sitt gode arbeid, seier styreleiar i Bremnes Fryseri AS, Jan Sverre Røsstad.
Bremnes Fryseri er morselskapet i Bremnes Seashore-konsernet. Konsernet har hovudkontor på Bømlo. Bremnes Fryseri har aktivitet i heile verdikjeden av lakseproduksjon, frå smolt til foredling og sal av merkevarer som Salma og Bömlo.
