Ho blir leiar for ny eining i Sveio kommune

Johansen jobbar i dag med by- og samfunnsplanlegging som rådgjevar i Stavanger kommune.

Ho er opphaveleg frå Haugesund. Og etter om lag 20 år sør for Boknafjorden kjem ho tilbake til heimtraktene sine, etter at ho er den blant 12 søkjarar som har fått tilbod om, og takka ja til, å leie den nye eininga, samfunnsutvikling, i Sveio kommune.

Børs og katedral

Johansen har lang yrkeserfaring får offentleg sektor, både i tidlegare Rennesøy kommune og no i Stavanger kommune. Ho har mellom anna vore kommunalsjef og elles hatt ulike rollar innan kultur, samfunnsutvikling og teknisk område.

Når det kjem til utdanning, seier ho at den inneheld både børs og katedral.

— Eg er samfunnsvitar. I tillegg til samfunnsfag, har eg har studert økonomi og administrasjon, fortel ho.

Den nye samfunnsutvikling-eininga i Sveio kommune skal ha ansvar for overordna arealplanlegging, næringsutvikling, utvikling innan kultur/idrett og folkehelse. Eininga vil ha oppstart i samband med at Johansen startar opp i si nye stilling rundt årsskiftet.

— Eg vart veldig interessert når eg såg utlysinga. Eg har eit positivt inntrykk av Sveio, som ein kommune som ligg frampå når det kjem til ønskje om å få til vekst, seier ho.

Skal sjå heilheita

Johansen seier at ho ser fram til å vere med på skape berekraftig samfunnsutvikling i Sveio, på lag med både tilsette i kommunen og lokalsamfunnet elles. Ho seier at ho kjem til å ta initiativ til å bli kjent med både næringslivet, landbruket og innbyggarane elles i kommunen.

Ho trur eit stikkord for hennas gjerning blir å sjå heilheita i alle planer og ønskjer i kommunen, i arbeidet med planar for samfunnsutvikling i tida som kjem.

— Kva likar du å halde på med på fritida?

— Eg er eit turmenneske. Og tur kan vere både reiser i utlandet og turar i fjellet, seier ho.

Urbant landbruk står også hjartet hennar nært.

— Eg har ein hage full av grønsaker, fortel Johansen.

Ho er elles veldig glad i kulturoppleveringar.

— Eg kallar meg sjølv for ei kulturkjerring, ler ho.

Johansen gler seg til å kome i gang i sin nye jobb.

— Det blir spennande og kjekt å bli kjent med Sveio, seier jo.