Helsehjelp på nett for psykiske plager

– Ved bruk av programmet Assistert selvhjelp er fagpersonen si viktigaste oppgåve å leggja til rette for den enkelte sin eigeninnsats. Den enkelte jobbar med eit sjølvhjelpprogram heime og følgd opp med telefonsamtaler under vegs, forklarar Nancy B. Helgesen.

Systematisk samarbeid

Ho er avdelingsleiar for psykisk helseteneste i Sveio. Helgesen fortel vidare at programmet passar for folk som slit med angst, vanskar med å sova, stress, depressive plager, bekymringar eller kjensle av å vera utbrende. Det er basert på kognitiv teori og er eit systematisk samarbeid mellom terapeuten og den som treng hjelp. På den måten får den enkelte godt eigarskap til sin betringsprosess. Programmet passar frå 16-årsalderen og oppover.

– Fordelen med dette programmet er at ein kan jobba heimefrå når det passar. Ein treng ikkje ta fri frå arbeid eller skule for å koma til avtalte samtalar på kontoret. I staden gir me tilbod om oppfølging på telefon eller Teams ein gong i veka, seier Helgesen.

Kan hjelpa fleire

For psykisk helseteneste er fordelen at dei kan hjelpa fleire, og kanskje også vera med på å førebyggja meir alvorlege psykiske lidingar.

– For nokre år sidan kunne folk ringa og få samtaletime så seia på dagen her i Sveio. Slik er det ikkje lenger. No er det ventetid på fleire veker og opp til ein månad hos oss. Andre stader er ventelistene endå lengre, seier Helgesen.

Ho understrekar difor sterkt at psykisk helseteneste ikkje gir akutt psykisk helsehjelp. I akutte tilfelle må fastlegen, legevakta eller AMK kontaktast.

I bruk i nabokommunar

For å koma i gang med Assistert selvhjelp må den som treng hjelp, ta kontakt med psykisk helseteneste. Vidare bruk av det nettbaserte programmet er gratis. Og sjølv om dette nettbaserte verktøyet er nytt i Sveio, er det godt utprøvd andre stader. Mellom dei som brukar opplegget er Haugesund, Karmøy og Vindafjord i Nord-Rogaland og Bømlo og Kvinnherad i Sunnhordland, viser Assistert selvhjelp si nettside.

Tilbod om kurs

Assistert selvhjelp er berre eitt av fleire tiltak psykisk helseteneste i Sveio tilbyr for å hjelpa folk som strevar med den psykiske helsa. I desse dagar startar dei for eksempel opp med eit kurs i angst- og stressmeistring. Og i slutten av november startar eit kurs med temaet «Korleis hjelpa engstelege barn?»

Helgesen nemner også heilårsbading som eit tiltak med mange helsegevinstar. Det er bra både mot stress, depresjon og for styrking av immunforsvaret, seier ho. Sidan februar 2023 har psykisk helseteneste hatt heilårsbading ein gong i veka. Dette har for det meste vore gjennomført i Førde.

Ho understrekar også kor viktig det er med sosialt fellesskap og fysisk aktivitet, og minner om ulike aktivitetstilbod som blir gitt mellom anna gjennom Frivilligsentralen.