nyhende
Held moglegheita for «Fritidskortet» i Sveio open
For eitt år sidan foreslo Sveio Høgre at Sveio kommune skulle søka om «Fritidskortet», ei ordning ville gitt to millionar kroner til barn og unge i Sveio. Dette var ikkje aktuelt å vera med på, og no er toget gått. Men ordføraren kan vurdera å søkja om moglegheita kjem igjen.
I kommunestyremøtet måndag kveld, hadde Sveio Høgre på førehand retta eit spørsmål til ordføraren, i form av det som heiter interpellasjon. Det er ikkje eit nytt tema, for rundt eitt år sidan bad partiet om at Sveio kommune skulle søka på ordninga «Fritidskortet», som Haugesund, Bømlo, Stord og Fitjar tilbyr til sine barn og ungdommar.
Ikkje kapasitet
Forslaget blei då nedstemt av formannskapet, med grunngjevnad at administrasjonen ikkje hadde ledig kapasitet til å ta seg av dette.
I interpellasjonen, forklarar Sveio Høgre at Fritidskortet er eit pilotprosjekt i regi av Barne-, Ungdoms- og Familiedirektoratet. Kommunar med Fritidskort får eit tilskot på mellom 800 og 1000 kroner per barn per halvår for alle barn i alderen 6 til fylte 18 år. I tillegg kan kommunen søka om inntil 500 000 kroner i halvåret til utviklingsmidlar/
Over tusen i målgruppa
– Sveio har over tusen personar i målgruppa, og med eit statleg tilskot på 2000 kroner per år gir det over 2 millionar kroner til våre barn og ungdommar, som kan brukast på ein eller fleire faste, organiserte fritidsaktivitetar. Me i Høgre meiner dette tilskotet vil vera bra for våre barn og ungdommar, og at fleire vil få moglegheit til å del i organiserte aktivitetar, står det i interpellasjonen, signert av kommunestyregruppa Lars Einar Hollund, John Kristian Økland og
Mikal Møller Hovda.
Høgre sitt spørsmål er følgjande:
Vil ordførar undersøka om Sveio kommune framleis har moglegheit for å søka seg inn i prosjektet Fritidskortet? Dersom dette framleg er mogleg, vil ordføraren ta initiativ til ein slik søknad?
Ordførar Linn Therese Erve (Ap) hadde klart eit svar til spørsmålsstillarane måndag kveld. Kort oppsummert er det ikkje nokon ny utlysing for Fritidskortet første halvdel i 2021.
Ikkje mogleg no
– Det er trist at me ikkje fekk høve til å vera med. Det hadde tilført barn og unge to millionar kroner kvart år, og ikkje minst styrka lag og organisasjonar, sa Lars Einar Hollund i Sveio Høgre. Han spurte om ordføraren og rådmannen om det er noko Sveio kan tenka seg å vera med på.
– Eg er open for å søka, men må komma tilbake til det, om det viser seg ei opning. Men på noverande tidspunkt er det ikkje mogleg, sa ordføraren.
