Har fått støtte til utvikling

Vestland fylkeskommune har løyvd 200 000 kroner til prosjektet Førde attende på tettstadkartet.

– Desse prosjektmidlane vil vera eit viktig bidrag i arbeidet med å få Førde på tettstadkartet igjen og for å til vekst og bulyst. Det er bra for Førde og bra for kommunen. Søknaden og prosjektet er forankra i Førde-bygda, seier ordførar Linn Therese Erve.

– Me har hatt svært gode møte og fått fleire innspel frå bygdalaget, lokalt næringsliv og eldsjeler. Eg gler meg til det vidare arbeidet og til å sjå kva me får til saman, seier ordføraren, som er svært glad for at Sveio kommune fekk støtte til utvikling.

Tettstad

I følgje Sveio kommune sin nettstad, skal pengane i første fase brukast til kartlegging av alle kvalitetane i bygda, slik at ein får eit grunnlag for vidare satsing på folketalsauke og næringsutvikling. Tanken er at heile bygdesamfunnet skal bli involvert i arbeidet, både unge og eldre, fastbuande og hyttefolk, næringsliv og kulturliv. Sveio formannskap vil vera styringsgruppe for prosjektet, og styret i Førde bygdalag vil vera den sentrale arbeidsgruppa. Heile idéen bak prosjektet er å utvikla bygda vidare basert på historie, kvalitet, kultur og bærekraft.

Får ein gjort synleg for omverda kva for kvalitetar som finst i Førde og som kan utviklast vidare, håpar ein å få til nok vekst til at Førde på ny får eit folketal som kvalifiserer til Statistisk sentralbyrå sin definisjon av ein tettstad, skriv Sveio kommune.