– Gratulera med ny hytte til alle sveibuar!

– Nipaståvo er alle sveibuar si hytte. Dagsturhytta er eit fantastisk prosjekt som eg håpar vil gi turglede til mange i alle aldrar. Her kan du rasta, nyta nista di og ei flott utsikt, sa ordførar Linn Therese Erve i si helsing.

Sveio kommune har vore avhengig av fleire gode samarbeidspartnarar for å få til dette prosjektet.

Mange å takka

Erve takka Vestland fylkeskommune og resten av sponsorane som har gjort dagsturhytta mogleg.

Ho takka også Auklandshamn bygdalag for deira store dugnadsinnsats med bygging av terrasseplatting og montering av utedo. Auklandshamn idrettslag, som har besørga skilting opp til Nipaståvo, fekk også velfortent takk frå ordføraren.

Stordugnad

Johannes Lie, som har hatt det overordna ansvaret for dugnaden, fortel at 25 personar frivillige har stått for 465 dugnadstimar, fordelt på 14 dugnadsøkter.

– Dugnaden starta i oktober i fjor med spadegraving for å klargjera tomta, i slutten av januar starta me å bygga platting rundt hytta. Me har hatt alt frå haglbyger og torevêr, til tele i jorda. Våren var svært kald, men det var stort sett opphald, så me hadde godt arbeidsvêr likevel, fortel Lie.

Namnevalet

Vinnarane av namneforslaget til Nipaståvo, Lars Bua og Astrid Hovda, fekk begge overrekt Sveio kommune sin turkopp i tre.

Lars Bua har sagt dette om bakgrunnen for namnet: «I min barndom var Nipaståvo namnet på nokre utilgjengelege brattheng på vestsida av Nipen, heimstad for tussar og nissar og denslags. Eg håpar den nye Nipaståvo blir ein treffstad og kvilestad for sveibuar og andre som finn glede, livslyst og helsebot i den vakre naturen vår.»

I august/september skal det setjast opp dagsturhytte nummer to i Sveio, den er planlagt på golfbanen. Dagsturhytta er teikna av Rojo arkitekter i Trondheim og den første dagsturhytta opna i Sogn og Fjordane i desember 2017. Så langt har det resultert i 38 ferdige hytter og våren 2022 skal det etter planen vera totalt 56 dagsturhytter i Vestland fylke.

To gode utgangspunkt for å koma til Nipaståvo:

Alternativ 1: Start på merka sti litt til venstre for Eikeland kapell. Først opp til utkikkspunktet Mjuko, derifrå vidare på sti merka med Emberlandsnipen.

Alternativ 2: Følg merka tursti frå Auklandshamn dagligvare.