nyhende
Idretten vil gjerne ta større ansvar for anlegg:
Glad for ny runde om Vigdartun
Både Sveio idrettsråd og Sveio idrettslag er glade for å få ei ny vurdering av utbyggingsplanane for Vigdartun. Begge er også opne for at idretten må ta større ansvar for bygging og drift av idettsanlegg.
Dette samsvarar godt med vedtaket formannskapet som styringsgruppe for nyskapande aktivitetsanlegg kom fram til sist måndag.
– Vegen å gå
– Eg trur absolutt det er vegen å gå. Det vil gi auka interesse for dugnadsinnsats og også gjera det lettare for næringslivet å gå inn med støtte. Men føresetnaden er at kommunen må forplikta seg til å gå inn med økonomisk støtte, seier Lars Einar Hollund.
Han er leiar i Sveio idrettsråd, der alle idrettslaga i kommunen er representerte. Hollund viser mellom anna til Bømlo, der dei aller fleste idrettsanlegga tilhøyrer klubbane, men der kommunen har forplikta seg til å gi støtte. Han meiner det er gode grunnar til at Sveio skal gjera det same. Ifølge utrekningar SSB har gjort, representerer idrettslaga i kommunen sin innsats når det gjeld fritidstilbod lønsutgifter på ti millionar kroner årleg.
– Det idretten i Sveio treng er auka treningsflater. Mangelen på lokalitetar medverkar til det store fråfallet me opplever i aldersgruppa mellom 13 og 19 år, seier Hollund vidare.
Han var sjølv med i formannskap og kommunestyre då arbeidet med nyskapande aktivitetsanlegg starta.
– Utgangspunktet var å sjå til Danmark og freista å utfordra dei nokså strenge norske reglane for utforming av idrettsanlegg. Dette ser det ikkje ut til at dei har lukkast med, seier Hollund.
– Treng kkje kontorbygg
Lillian Rommetveit er dagleg leiar i Sveio idrettslag og deler Hollund sine synspunkt.
– Utfordringa vår er hallkapasiteten. Slik er det også for Sveio Drill og andre brukarar. Det er treningsrom me treng, ikkje eit kontorbygg slik planane for nyskapande aktivitetsanlegg langt på veg har blitt, seier Rommetveit.
Ho viser til befaringar som idrettslaget har hatt med politikarar for å visa behova.
– Andelen barn og unge som deltar i fritidsaktivitetar er låg i. Sveio samanlikna med andre kommunar. Mangel på lokalitetar er ein viktig grunn til dette, meiner Rommetveit.
Difor meiner ho det er rett å ta ein ny runde om utbygginga av Vigdartun. Ho er open for at idretten får ta større ansvar for idrettsanlegga i framtida.
