nyhende
Frukostmøte om viktige satsingsområde
Solenergi og klimatiltak står på programet for mai-frukosten til Sveio Næringsforum 24. mai.
Endra vil presentera solcellekraft-satsinga deira i Sveio, og Steinar og Maria Nesse skal snakka om solenergi på garden og framtidstru.
Samfunnsplanleggar Stine LIse Espeland innleiar om Sveio kommune og næringslivet sitt arbeid med klimatiltak. Bedriftspresentasjonen denne fredagen er Bjelland Elektro.
Viktige område
– Energi, klimatiltak og bærekraft er viktige statsingområde og høgaktuelt i høve til det grøne skiftet. Det er kjekt å kunna presentera ulike prosjekt som er på gang i Sveio. Me er også glade at unge næringsdrivande ved Maria Nesse vil fortelja om si framtidstru og satsing, seier Nina Matre, styreleiar i Sveio Næringsforum.
Ope for alle
Ho understrekar at alle er velkomne, og ut frå temaet er det sendt særleg invitasjon til bøndene i Sveio.
– Me er næringsforum for alle i Sveio, og me håper det kjem eit breitt spekter av næringsdrivande. Me har synergier av kvarandre, og frukostmøta er også viktig for å bli kjent, seier Matre.
Sidan det blir servert frukost, er det påmelding seinast 23. mai.
