Frivilligheitsprisane: No skal eldsjelene løftast fram

Prisane som skal delast ut er den nasjonale Frivilligprisen, Årets nykommar i det frivillige, Årets frivilligheitskommune og Helseprisen.

– I ei tid der demokratiet står under press, er utdelinga av dei nasjonale frivilligheitsprisane ekstra viktig. Frivilligheit er demokrati: Frivillige organisasjonar gjer demokratiet vårt robust. Dei er eit bindeledd mellom folk og politikarar, og dei er ein stad der ein kan lære seg å delta i demokratiske prosessar. I den utfordrande tida vi er i no er det å nominere til dei nasjonale frivilligheitsprisane ein måte å løfte fram dei frivillige organisasjonane og vise kor viktig rolla dei har i samfunnet vårt, seier generalsekretær Stian Slotterøy Johnsen i Frivillighet Norge.

Dei nasjonale frivilligheitsprisane vert delte ut 4. desember i samband med den internasjonale FN-dagen for frivilligheit 5. desember. Kultur- og likestillingsdepartementet, Norsk Tipping, Frivillighet Norge, KS, Stiftelsen Dam og Frivillig.no står bak utdelingane.

– Vi håpar sjølvsagt å få inn mange nominasjonar og alle kan bidra! Viss du veit om ein god kandidat som du ønskjer å setje pris på, er det ingen grunn til å vente med å nominere, seier Slotterøy Johnsen.

Dei fire prisane har ulike mål og nominasjonsfristar. Les meir og send inn dine nominasjonar på frivillighetensdag.no og dam.no.