Fosterforeldre får klagerett

– Dette er viktig og noko mange fosterforeldre har kjempa for lenge, seier barne- og familieminister Kjersti Toppe (Sp).

Toppe lanserte nyheita på Fosterhjemskonferansen til Norsk Fosterhjemsforening måndag.

– Dette nye politiske vedtaket vil gi fosterheimar meir føreseielegheit og meir tryggleik, og fleire vil dermed greie å stå i samfunnsoppdraget som fosterforeldre. Vi gler oss over eit stort og viktig steg i rett retning for rettstryggleiken på fosterheimsfeltet, seier Tone Granaas, generalsekretær i Norsk Fosterhjemsforening, i ein e-post til NTB.

Endringa kjem etter at Barne- og familiedepartementet har gjort ei ny juridisk vurdering av fosterheimsavtalen. Det er avtalen som blir inngått mellom fosterforeldre og barnevernstenesta når eit barn flyttar inn i ein fosterheim.

– Positiv effekt

Departementet har komme fram til at avgjerder om mellom anna økonomisk godtgjersle blir rekna som enkeltvedtak etter forvaltningslova. Det betyr at fosterforeldre no får klagerett på desse områda.

Toppe trur endringa kan føre til å løyse rekrutteringsproblem i fosterheimsordninga.

– I dag er det stor mangel på fosterheimar og alvorlege rekrutteringsutfordringar. Noko fosterheimane sjølv peikar på, er uvisse knytt til rammevilkåra. Ein klagerett vil ikkje berre bidra til meir føreseielegheit for fosterforeldre, det vil også redusere utilsikta forskjellar mellom fosterheimane. Det kan ha ein positiv effekt på rekrutteringa av nye fosterheimar, seier ho

Regjeringa ønskjer å betre rekrutteringa av fosterheimar og har sett i gang eit større arbeid på området. Dei arbeider med ei eiga fosterheimsmelding som kjem i 2024.

– Ein ekstra tryggleik

Klageretten er også viktig for rettstryggleiken, meiner Toppe.

– Eg veit at mange kommunar gjer gode vurderingar i dag og har eit godt samarbeid med fosterheimane. Men i dei sakene der kommunen og fosterheimen ikkje er samde, eller kommunen ikkje har gjort gode nok vurderingar, vil ein klagerett føre til at rammevilkåra blir lagde på eit rett nivå. På den måten vil han vere ein ekstra tryggleik, seier ho..

Departementet har laga eit informasjonsskriv som blir sendt ut til alle kommunar og statsforvaltarar om saka.