Forsvarssjefen: Tenk på Ukraina når du tankar bilen

– Det betyr at vi kanskje må leve med energimangel, høgare prisar og ein del ting. Eg tenkjer at alle som fyller diesel til meir enn vi skulle ønske, bør tenkje at vi gjer det fordi det er ein krig i Europa, seier forsvarssjefen til NTB.

Samtidig seier han at Ukrainas lynoffensiv og suksess på slagmarka gjer at ein kan lure på om dei russiske styrkane kollapsar. Då kan Ukraina vinne raskt.

Han dreg parallellar til Afghanistan, der han sjølv har tenestegjort og der han som forsvarssjef såg den afghanske hæren falle saman i fjor sommar. Taliban kunne dermed ta over Kabul nesten utan kamp.

– Eg er spent på kva det eigentleg betyr for dei russiske styrkane. Viss det er ein kollaps i kampmoralen deira har dei eit alvorleg problem. Vi såg det tydeleg i Afghanistan kor fort Taliban eigentleg overtok, seier Kristoffersen.

– Det er for tidleg å seie. Eg vil ikkje undervurdere på nokon som helst måte dei russiske styrkane. Det er ein del spekulasjonar om det er ein kollaps eller ikkje, seier han.

Ifølgje Kristoffersen er det ein slik kollaps som må til viss Ukrainas suksess han offensivane i siste tida skal bli eit vendepunkt for krigen.

– For reint militært er Russland framleis sterke nok til å halde områda lenge. Eg trur framleis at dette blir ein langvarig krig, som kjem til å ha dynamikk langs frontlinjene. Viss ikkje det ikkje blir ein slik kollaps, då.

– No er det Russland som gir oss våpen

Ukraina har hatt enorm suksess i Kharkiv, men har også ein offensiv i Kherson i sør, har trua Krim med rakettar og held stillingar i Donbas.

– Den offensiven som starta i sør og i Kharkiv, han hadde veldig stor framgang på ukrainsk side. Dei russiske styrkane trekte seg ikkje tilbake i ordna former, men måtte rømme stillingane sine. Dei måtte late etter seg materiell og det var inga kontrollerte tilbaketrekking, seier Kristoffersen.

– Det vart tydeleg då Ukraina sa «det er Russland som no forsyner oss med mest våpen». Og det er sant. Russarane rømde stillingane sine og lét etter seg masse materiell, seier forsvarssjefen.

Vestleg støtte er eit viktig element framgangen i den siste tida for Ukraina. Det skjer både i form av våpen- og ammunisjonsstøtte, men også gjennom etterretning og såkalla wargaming med USA, der scenario for ein offensiv eller eit slag blir spelt ut.

– Eg vil ikkje gå inn i detaljar, men betydninga av den vestlege, militære støtta er heilt uvurderleg. Ammunisjonsforbruket er veldig høgt. Ukraina mistar materiell og soldatar, så det å halde fram med å gi støtte med militært materiell, ammunisjon og trening av ukrainske soldatar er viktig for at Ukraina skal stå imot Russland, seier Kristoffersen.

Trenar ukrainske soldatar

Det norske forsvaret har også trena opp ukrainske soldatar i Noreg. Det er gitt få detaljar om dette.

– Frå norsk side har vi trent dei i mindre forband, på artilleri i ein runde der vi lærte dei å gjere enkelt vedlikehald og følgde opp med avansert vedlikehald. Så har vi sagt oss villige til å støtte grunnutdanning av ukrainske soldatar utanfor Ukraina, men der er det mange som har sagt seg villige til, så det er ikkje mangel på instruktørar, seier Kristoffersen.

Det norske forsvaret følgjer tett med på krigen for å sjå kva som kan lærast av den. Ukraina er eit land i ein heilt annan storleiksorden enn Noreg, men forsvarer seg mot eit større land. Det er noko Forsvaret analyserer i alle våpengreiner, seier Kristoffersen.

Han seier at det ikkje er noko som tyder på at tryggingsbiletet er endra for Noreg. Det er liten aktivitet på russisk side i nordområda, seier forsvarssjefen.

(©NPK)