Først med bruk av ny meistringsteknologi

Avtalen er inngått gjennom Haugaland Vekst, som har stått for prosjektarbeidet  saman med brukarrepresentantar, Helse Fonna, Høgskulen på Vestlandet, Utviklingssenter for sykehjem og hjemmetjenester og FOUSAM.

Dei ti kommunane som er omfatta av avtalen, er Sveio, Haugesund, Karmøy, Tysvær, Bokn, Utsira, Vindafjord, Etne, Sauda og Suldal.

Oppstartmøte i neste veke

– Me skal ha oppstartmøte med Telenor allereie neste veke og blir såleis den første kommunen som kjem i gang før ferien, seier kommunalsjef for helse og omsorg, Ingunn Toft, til Vestavind.

Sveio og fire av dei andre kommunane som er omfatta av avtalen, har allereie Telenor som leverandør av tryggleiksalarmar. Dette er også grunnen til at dei kjem raskt i gang med bruk av nytt utstyr, forklarar Toft.

For Sveio sin del er det mest aktuelt med oppgraderte tryggleiksalarmar kobla opp mot Telenor sitt responssenter i Kristiansand. Dette senteret er bemanna heile døgnet. Sveio vil også ta i bruk oppkobling mot e-låsar, forklarar kommunalsjefen.

Ved hjelp av dette utstyret kan for eksempel heimesjukepleien sine tilsette låsa seg inn til brukarane ved hjelp av ei app på telefonen i staden for å ha med seg nøklar.

Mange hjelpemiddel

Systemet opnar også for brannvarsling. I neste omgang kan det bli aktuelt å ta i bruk videoovervaking, GPS og fallalarmar som også ligg i systemet, fortel Toft.

GPS-systemet kan for eksempel seia frå om nokon forvillar seg ut om natta og ikkje er i stand til å seia frå eller finna tilbake sjølv, forklarar prosjektleiar Sturle J. Monstad i Haugaland Vekst.

Ingunn Toft er ikkje redd for å vera pioner og hausta erfaringar som dei andre kan dra nytte av når dei etter kvart blir kobla på.

– Det er vel både fordelar og ulemper med å vera først. Det kan innebera at me må takla eventuelle oppstartproblem, men me får også vera med å påverka tilpasninga av systemet. Og Telenor er ein solid leverandør. Me reknar difor ikkje med altfor store utfordringar.