Forsking: Jo fleire steg per dag, desto lågare risiko for kroniske ryggproblem

Det er forskarar ved NTNU som har funne ut dette: Det å gå i meir enn 100 minutt til saman dagleg, gav 23 prosent lågare risiko for kroniske korsryggsmerter, enn å gå i under 78 minutt per dag.

Det vart også funne ein samanheng mellom stegfart og intensitet og betre rygghelse.

– Funna våre tyder på at dagleg gangvolum er viktigare enn gjennomsnittleg gåintensitet for å redusere risikoen for kroniske korsryggsmerter, skriv forskarane i den norske studien « Volume and Intensity of Walking and Risk of Chronic Low Back Pain». Den vart nyleg publisert i JAMA Network Open og har fått merksemd globalt.

– Dette er eit viktig funn fordi det å gå er ein enkel, rimeleg og tilgjengeleg aktivitet som kan fremjast breitt, seier førsteforfattar Rayane Haddadj, stipendiat ved Institutt for samfunnsmedisin og sjukepleie ved NTNU. Han påpeikar overfor NTB i ein e-post at dette støttar Verdshelseorganisasjonen (WHO), som seier at all rørsle tel på vegen mot betre helse.

Forskarane meiner vidare at funna tyder på at retningslinjer og folkehelsestrategiar som fremjar gonge, kan bidra til å redusere den samla belastninga på samfunnet av kroniske korsryggsmerter i befolkninga.

Betre å rusle enn ikkje noko

Forskarane henta data frå Helseundersøkelsen i Nord-Trøndelag (HUNT). Over 11.000 deltakarar frå 20 år og oppover vart følgde. Dei hadde i utgangspunktet ikkje ryggplager. Dei gjekk med eit akselerometer og fekk aktivitetsnivået sitt registrert over sju dagar. Fire år seinare vart dei følgt opp. Nær 15 prosent, 1659 deltakarar, hadde då fått kroniske ryggsmerter. Desto høgare aktivitetsnivå fire år tidlegare, desto lågare risiko for at dei hadde fått kroniske ryggsmerter.

– Studien vår registrerer all rørsle, og funna viser at aktivitet og rørsle, heller enn å vere i ro, er gunstig for kropp og rygg, seier medforfattar i studien, førsteamanuensis Anne Lovise Nordstoga ved Institutt for nevromedisin og rørslevitskap til NTB.

Den største risikoreduksjonen vart observert når gåinga auka frå lite til moderat mengd. Du har betre av alt frå rusling til postkassa, å ta trappa i staden for heisen og å bevege deg meir rundt i eigen heim, heller enn å sitje eller liggje stille.

Kostbart helseproblem

Menneske i alle aldrar kan få smerter i korsryggen. Ifølgje forskingsartikkelen utgjer denne typen kroniske ryggproblem 7,7 prosent av alle åra med uførleik på verdsbasis. Korsryggproblem er blant dei mest kostbare kroniske tilstandane i helsevesenet.

Over 600 millionar menneske har kroniske smerter i nedste halvdel av ryggen, og talet er venta å stige til over 843 millionar i 2050, ifølgje Verdshelseorganisasjonen (WHO). I USA medfører ryggsmerter nokre av dei høgaste helsekostnadene og er ifølgje CNN den leiande årsaka til uførleik.

Likevel er moglege førebyggjande grep lite undersøkt. Helsenoreg tilrår likevel generelt fysisk aktivitet og understrekar at det ikkje er nødvendig å trene hardt for å få betre helse, all fysisk aktivitet tel.

NTNU-forskarane skriv at denne studien, så vidt dei veit, er den første i sitt slag, gjennomført med eit såpass stort og breitt utval over tid, og som viser ein samanheng mellom å gå og risiko for ryggsmerter.