nyhende
Fleire milliardar kroner til vêr- og terrorsikring av vassmagasin
Vassmagasina i landet skal rustast opp. Meir enn 8,5 milliardar kroner blir lagde i potten for å sikra dei mot potensiell terror og ekstremvêr.
– No bygger me to flunkande nye steinfyllingsdammar med asfaltkjernar. I stor grad er det for å tilfredsstilla det framtidige sikkerheitskravet, seier prosjektleiar Arne Sandvold i Statkraft til NRK.
Onsdag kollapsa delar av demninga på Braskereidfoss kraftverk i Våler som følgje av ekstremvêret «Hans».
No pålegg Noregs vassdrags- og energidirektorat (NVE) Statkraft å oppgradera 76 damprosjekt. Prosjektet kostar meir enn 8,5 milliardar kroner, ifølgje kanalen.
Bakgrunnen er klimaendringar, ekstremvêr og eit auka terrortrusselbilde.
Blant dei største prosjekta er Mår-fjellet i Tinn, Trollheim i Rindal/Surnadal, Nesjødammen i Tydal og Kjela i Vinje.
