nyhende
FHI vil endre vaksinasjonsprogramma
Folkehelseinstituttet (FHI) tilrår at barn også blir vaksinerte mot vasskoppar, og at vaksne blir vaksinert mot helveteseld.
Helse- og omsorgsdepartementet blir tilrådd å inkludere vaksine mot vasskoppar i barnevaksinasjonsprogrammet, og at vaksine mot helveteseld blir teken inn i vaksinasjonsprogrammet for vaksne. Det kjem fram i to pressemeldingar frå FHI.
Vasskoppar
– Vaksinen mot vasskoppar vil gi direkte vern til barna som tek han, og gi indirekte vern til barn som ikkje kan ta vaksinen på grunn av sjukdom gjennom flokkimmunitet, seier Siri Helene Hauge, avdelingsdirektør for smittevern og vaksine i Folkehelseinstituttet.
FHI tilrår to dosar vasskoppvaksine for barn: første dose ved 15 månader, samtidig med MMR-vaksinen, og andre dose i 2. klasse. I tillegg blir det tilrådd eit mellombels opphentingsprogram for ikkje-immune barn i alderen 2 til 15 år.
Helveteseld
For helveteseldvaksinen tilrår FHI at alle får tilbod om to dosar det året dei fyller 65 år, og eit mellombels opphentingsprogram for 70- og 75-åringar.
– Vaksinen gir spesielt god vern mot helveteseld og komplikasjonar av helveteseld, uavhengig av alder og underliggjande helse, seier Hauge.
Metodevurderingane som ligg til grunn for tilrådingane, vart overleverte Helse- og omsorgsdepartementet i januar 2026. Det er opp til departementet å avgjere om vaksinane skal innførast.
