nyhende
Ferja går no som normalt
Sambandet Langevåg-Buavåg blei innstilt frå klokka 15.00 onsdag på grunn av uvêret. Vinden er ferd med å løya, og klokka 13.17 kunne kapteinen på «Bømlafjord» fortelja at dei var på veg inn til Buavåg.
Det dårlege vêret er årsaka, og i går kunne ikkje Fjord1 sei noko om kor lenge sambandet ville bli stengt. No ventar dei opning frå klokka 13.00, men varslar samtidig at det kan koma ny melding om endringar.
I 15-tida i går viste meldingane for Buavåg at det bles liten storm frå vest i kasta. Dette skulle auka på til full storm før det roa seg ørlite nokre timar om kvelden, men framleis ville det vera storm i kasta. Ny vindauke med kast på opp 27 m/s – full storm er 24,5-28,4 m/s – var venta frå 6-tida i dag og fram mot lunsjtider.
Har bytta frå Mortavika til Hanasand
Fjord1 endra hamn til Hanasand på sambandet Arsvågen-Mortavika tidleg i går ettermiddag. Der reknar rederiet med at omlegginga vil vara fram til i kveld eller i morgon tidleg.
Trafikkmeldingar frå Fjord1 finn du her.
Sandvikvåg-Halhjem går førebels som normalt, men Torghatten meldte i går at det kan bli kanselleringar på kort varsel frå torsdag morgon. Dette vil skje dersom vindretning og styrken på vindkasta endrar seg. Dei ber difor reisande om halda seg oppdatert på nettsida deira.
