nyhende
Elitekorps kjem til Sveio
Til helga kjem Kleppe Musikklag frå Askøy til Sveio. Korpset skal ha sitt årlege oppstartseminar i Vigdartun og avsluttar med konsert i Sveio kyrkje søndag ettermiddag.
Blant dei 30-35 musikarane som kjem, er sveibuen Håvard Liknes.
— Me er også fleire frå Haugalandet. Det er litt av grunnen til at me har valt å leggja seminaret i år til Sveio, fortel Liknes.
Han legg til at det er skulekorpsa på Haugalandet som har lært opp musikarane frå denne delen av landet. Derfor ønskjer dei å gi noko tilbake til regionen. Skulekorpsa på Haugalandet og i Sunnhordland har fått invitasjon til å delta på konserten i Sveio kyrkje, men det passa ikkje for nokon av dei.
Kleppe Musikklag er eit elitedivisjonskorps som spelar på eit nasjonalt toppnivå – topp ti i landet, seier Liknes. Musikarane skal både øva og overnatta i Vigdartun.
— Tilbake til luftmadrass, med andre ord. Det går fint, me er unge folk. Gjennomsnittsalderen er midt på 20-talet, seier den utflytta sveibuen.
Han kan elles fortelja at han ikkje er den første sveibuen som spelar i det kjende korpset frå Askøy.
— Me får håpa sveibuar og haugalendingar elles vil koma på konserten. Det er ikkje kvar dag eit korps på dette nivået opptrer i Sveio, seier han.
