nyhende
Lågast arbeidsløyse i Sveio
– Ein milepæl er nådd
Kvar månadsslutt oppsummerer NAV region Sunnhordland tilstanden i arbeidsmarknaden. Me skriv 1. oktober, og denne gongen kjem ei gladmelding. Arbeidsløysa er låg, og i Sunnhordland er Sveio ein av kommunane med lågast arbeidsløyse.
I september var arbeidsløysa i Sunnhordland til saman 1,9 prosent av arbeidsstyrken. Det er ein nedgang på 71 personar i høve førre månad.
– Dette er svært gode nyhende. Arbeidsløysa er no på same nivå som før koronapandemien. Det må seiast å vera ein milepæl, seier Håvard Lægreid, leiar i NAV region Sunnhordland i ei pressemelding.
Med ei gjenopning av samfunnet og mange ledige stillingar, meiner leiaren at det er full fart i arbeidsmarknaden.
– Arbeidsmarknaden i Sunnhordland har kome relativt godt gjennom pandemien. Gjenopninga kan gi ein ekstra positiv effekt, som til dømes høgare aktivitet innan bransjar som transport, servering og tenesteyting.
Kvalifisere folk til ledige jobbar
I september var det registrert 238 ledige stillingar hos NAV i Sunnhordland. Så langt i år har det i snitt vore utlyst 307 stillingar kvar månad.
– Det er ein jamnt høgare stillingstilgang i år enn i fjor. Me ser at mange bedrifter rekrutterer nye medarbeidarar, og behovet er der i fleire bransjar, seier Lægreid.
– Fleire av dei ledige stillingane har krav om fagbrev eller høgare utdanning. For jobbsøkjarar vil kompetanse vera eit nøkkelord. For NAV er det ei viktig prioritering at me kvalifiserer folk til dei ledige jobbane, seier Lægreid.
Lågast arbeidsløyse i Sveio og Kvinnherad
I september hadde alle kommunane i Sunnhordland ein nedgang i arbeidsløysa. Lågast arbeidsløyse var det i Sveio og Kvinnherad (begge 1,4%).
Snittet for heile Sunnhordland er på 1,9 prosent, som er lågare enn gjennomsnittet for både Vestland (2,3%) og landet (2,4%).
