Ein historisk treårsperiode for arbeidsløysa

Det er om lag på same nivået som november månad. Andel heiltidsledige av arbeidsstyrken i Sunnhordland har ikkje vore så lav over ei så lang periode tidlegare.

I 2022 var andel heiltidsledige 1,3 prosent, i 2023 var den 1,0 prosent og i 2024 enda andel heiltidsledige på 1,1 prosent, skriv Nav region Sunnhordland i ei pressemelding

Topp i 2016

Snittet for åra 2000-2021 var 2,7 prosent, med ein topp på 4,1 prosent i 2016. Heiltidsledige er personar registrert som arbeidssøkarar hos Nav, har vore utan arbeid dei siste to vekene og er tilgjengeleg for ordinært arbeid.

– Med eit stabilt, lågt nivå for arbeidsløysa i Sunnhordland, vil me i Nav også i tida framover vera ein viktig samarbeidspartnar for bedrifter i regionen som ønsker å rekruttera. Likevel ser me at det framleis er mange som står utanfor arbeidslivet, men som har eit mål og ønske om å koma i arbeid, seier Håvard Lægreid, leiar i Nav region Sunnhordland.

Som eit ledd i å både inkludert dei som står utanfor og driva rekrutteringsbistand for bedriftene, har Nav dei siste åra mellom anna starta opp fleire kvalifiseringsløp i samarbeid med det lokale næringslivet. Noko dei ser på som svært nyttig både for arbeidssøkarane og bedriftene.

Etablerer nytt prosjekt for fagarbeidarar

Nav oppdaterer jamleg sin arbeidsmarknadspronose  for Noreg. I prognosa publisert i desember i år, spår dei at arbeidsløysa på landsbasis i 2025 vil halda fram med å auka noko, men i eit saktare tempo enn den har gjort.

For 2024 enda den nasjonale arbeidsløysa på 2 prosent, og er venta å auka til om lag 2,1 prosent i 2025 og 2,2 prosent i 2026.

– I Sunnhordland er det venta at arbeidsløysa vil halda fram med å ligga på eit lågare nivå enn resten av landet i 2025. Oljeinvesteringane er venta å halda seg på eit høgt nivå også i det neste året, noko som er positivt for industrien i regionen vår. Det vil difor også i det komande året kunna bli utfordrande å få tak i kvalifisert arbeidskraft.

– For å hjelpe til med dette vil me i 2025 gå i gang med eit prosjekt saman med fylkeskommunen og fleire arbeidsgivarar i regionen vår, i ei satsing som blir kalla Fagveg. Her vil aktuelle arbeidssøkarar gå gjennom ei fleksibel og tilrettelagt opplæring for å oppnå kvalifikasjon som fagarbeidar, seier Lægreid.

Framleis høg andel uføre

I Sunnhordland er talet på uføretrygda 11,3 prosent av arbeidsstyrken, noko som er høgare enn snittet både nasjonalt (10,5 prosent) og i Vestland (8,9 prosent).

Blant kommunane i Sunnhordland er det Kvinnherad som har det høgaste snittet med sine 12,3 prosent, noko som er 2,5 prosentpoeng høgare enn den kommunen i Sunnhordland der det er lågast, som er Bømlo med 9,8 prosent.

– Me i Nav skal sørga for at dei personane som mottek uføretrygd, og som tek kontakt med oss med eit ønske om å kome i arbeid, skal få god rettleiing og bistand til å oppnå dette. Vårt mål er at dei som kan kombinere uføretrygda si med ei arbeidsinntekt, skal få høve til dette, seier Lægreid.