– Ei heilt spesiell oppleving!

– Ordinasjonen var ei heilt spesiell oppleving! For det første er Viborg Domkyrkje heilt unik og flott. Her talar vegger og tak med sine bilete fra bibelhistoria.

For det anna, var det utruleg mange prestar og andre fra kyrkjelyden som var med i forbønshandlinga oppe ved alteret og dermed understreka at me både får kraft til tenesta  frå Gud og i fellesskapet med kvarandre, fortel Liv Marit Tjelle Holm. 

57-årigen studerte teologi i vaksen alder, og har bakgrunn som lærar. Frå 1. februar er ho tilsett som sokneprest i Thyholm Pastorat i Struer prosti i Danmark.

– Det skal bli svært godt å koma i gong, kommenterer Tjelle Holm som bur i Viborg saman med ektemannen, Jørgen Tjelle Holm, som også er prest i Viborg Stift, og dottera, Mette Marit, som går siste året på gymnaset. No skal familien flytta til prestegarden på Jegindø i Thyholm som ligg halvanna times køyring nordvest frå der dei bur no.

«Skifta beite»

– Thyholm minnar litt om Sveio kommune i storleik, men har berre knapt 3700 innbyggjarar. Thyholm har fem kyrkjer, eg er tilsett i tre av dei, men skal saman med min kollega, Thomas Buelund, dela ansvaret for at det normalt er gudstenester i fire av kyrkjene kvar søndag. Det vil seia at me begge har to gudstenester kvar søndag, og ein søndag i månaden er fri.

– Samstundes som bispedømet er oppteken av at det er gudstenester der ein bur, har dei samla seg om eit nytt kyrkjesenter i den største tettstaden, Hvidbjerg, kor det er kontor og gode fasilitetar til undervisning, møte og føredrag, opplyser ho.

– Kva var det som avgjorde at du ville bli prest?

– Kyrkja har alltid vore ein avgjerande plass i livet mitt. Her blei eg tatt med som barn av foreldra mine og her fann eg inn i ungdomstida etterkvart som eg flytta rundt, som student i Bergen og Stord og seinare i arbeide i Stavanger. Då eg gifta meg med Jørgen, som var prest i den danske kyrkja i Flensborg, blei det til mange gode år, kor eg levde tett på prestelivet, var engasjert som «kona til presten» og blei meir og meir interessert i det som for meg var både mi tru og eit fag eg underviste i skulen.

– Då familien for tre år sidan flytta til Viborg og Danmark, blei eg merksam på ein muligheit for personar med anna utdanning og med erfaring fra kyrkjelydsarbeid, til å få ein «overbygning» med teologi og praktikum med utgangspunkt i ein søknad til eigen biskop. Eg fekk eit ja. Det var ein sjanse og ei utfordring eg ser fram til med forventning og glede. Dermed blir eg ein av mange, som i godt vaksen alder har «skifta beite», men tar med meg mange gode erfaringar frå mitt liv som lærar.

Tre av fire søsken er prestar

– Kva tenkjer du om prestetenesta, og kva er det viktigaste med tenesta?

– Kyrkja er viktig møteplass for folk i lokalsamfunnet. Eg håpar på at eg kan vera ein som folk vil koma til når dei treng ein å samtala med og at gudstenestene kan fortsetja med å vera ein plass kor tru blir forkyndt, så det gir meinig og liv for folk. Eg kjem heldigvis til ein aktiv kyrkjelyd som er glade for kyrkjene sine og kor fellesskapet er viktig.

Liv Marit Tjelle Holm er dotter av Sigrid og Sigve Tjelle. Foreldra hennar har opplevd noko så spesielt som at tre av dei fire borna deira er prestar. Einar Tjelle er nestleiar i Mellomkirkelig råd i Oslo, medan Christoffer Tjelle jobbar som prest i Drammen. Fjerdemann er lærar på vidaregåande skule i Lyngdal. Alle oppvaksne i Førde.

– Me synes det er svært bra at tre av borna våre har blitt prestar, me kjenner oss heldige fordi dei vil jobba med det same som me trur på, kommenterer Sigrid og Sigve Tjelle stolte.