Bli abonnent
Logg inn

nyhende

Ved å levere inn egg til påskeharen kunne ein få ein søtsak i bytte.

Eggjakt i friskt ruskevêr på Ryvarden

Trass i vind og ruskevêr møtte mange opp då den tradisjonelle påskeeggjakt vart arrangert på Ryvarden kulturfyr palmesøndag.

Publisert

Det var ikkje det klassiske påskevêret der sola lokka folk ut på knausane kor ein kunne nyta niste og kaffi. I staden var det heller å søke etter lune krokar eller ly bak husveggane. Likevel var stemninga god, og for små og store som jakta etter påskeegg som var plassert i området rundt fyret, blei det ei frisk fyroppleving med vind og regn som røska godt i andletet.

Vaflar, kakao og bursdagsfeiring

Nysteikt vaffellukt frå kafeen, varm kakao og kaffi var det fleire som nytte godt av. Av dei var Irene Flatnes Haldin (40) og tantebarnet Vilde Flatnes Kristiansen (9) som begge feira bursdagen sin med nysteikt vaffel denne palmesøndagen. 

Vilde hadde leita etter egg saman med søskenbarnet Einar, og kunne stolt visa fram begge hendene fulle med egg. 

Einar Haldin og Vilde Flatnes Kristiansen med hendene fulle av egg. Vilde feira 9-årsdagen sin med vaffel og eggjakt.
Irene Flatnes Haldin, Morten Haldin, Geir Flatnes og fremst Lasse Haldin.
Eit egg ventar på å bli funne – om ikkje av tobeinte denne dagen, så av dyr og fuglar seinare.
Maja Flage i påskeharedrakt sørgde for at det heile tida var egg å finna.
Linn Victoria og Tiffany Økland frå Haugesund kombinerte eggjakt med kafébesøk på Ryvarden. Trass i friskt vêr smakte det med ein kald is, fortel Tiffany.
Marta Svendsbø frå Liereid saman med Alfred Steine og Joakim Steine frå Haugesund.
Ingrid, Jenny og Ole Brekke fann le for vinden saman med hunden Leo – sjølv om det framleis var nok av frisk vind i håret.
Små og store på leit etter egg bak knausar og i graset.
Mia og Sam Wee klarte å finna fleire egg i blesten. Mor Lisbeth Wee står bak. Familien var på tur frå Haugesund til Sveio.
Øystein Nygård, Mari Årebukt, Arne Årebukt, Emma Støle Årebukt, Andreas Aadland og Gro Støle Årebukt. Storfamilien frå Haugesund var samla på hytta i Mølstrevåg i påskeferien. Med på tur var også søskena Eirik og Jone, godt innpakka i vogna.
Marius Susort Hansen (5) , Marie Susort Hansen (14), Marthe Synnøve Johannessen og Ida Susort Hansen (12), tok turen frå Haugesund. Mellom regn og vind fann dei ein lun krok og tok nistepause med vaflar.
Oskar og Nelly Bjelland frå Stord fekk veksla inn egga sine. Turen til Ryvarden var ein del av det å vera på påskeferie hjå mormor i Sveio.
Sindre Stensland med Frøya Stensland på skuldrene, godt kledd med hetta trekt over i ly for vinden.

Opningstider og aktivitet på fyret

Kafevert Jenny Haldin var utkledd som påskehare saman med Maja Flage frå Saltveit, og her kunne egga vekslast inn mot noko søtt. Dei fortel at dei hadde tre bøtter med kokte egg. 

Påskeharane Maja Flage (t.v.) og Jenny Haldin med korga full av godsaker som dei bytte mot egg.

– Etterkvart som me får inn egg gøymer me dei på nytt. Egg som ikkje blir funne blir før eller sidan til mat for dyr i naturen her, fortel Haldin. 

Ho fortel vidare at fyret hadde sesongopning den 1. mars, og framover er fyret ope på søndagar og raude dagar. I påskeveka er det ope kvar dag unntatt påskeaftan. I sommarsesongen vil det vera utvida opningstider. 

Inne på fyret er det glasskunsten til Kirsten Vikingstad Hermansson som fyller lokala no. Kulturfyrvaktar Ruth Grethe Østebøvik Eriksen oppmodar folk til å følga med på Facebook-sidene til Ryvarden for oppdatert informasjon om utstillingar og opningstider. 

Kulturfyrvaktar Ruth Grethe Østebøvik Eriksen sørga for nysteikte vaflar til dei besøkande saman med fyrvert Margareth Odland.

Godt oppmøte trass vêret

Kulturfyrvaktaren, som stod for vaffelsteikinga saman med fyrvert Margareth Odland, fortalte om eit godt oppmøte, sjølv om vêret kan ha påverka besøksmønsteret der ein gjerne ikkje blir sittane og nyta sol og fint påskevêr.

– Det har vore godt trøkk, men det var mange som var tidleg ute og klare då eggjakta starta, for slik å kunna gje seg på heimvegen før vinden tok seg for mykje opp. Men eggjakta har dei fått med seg, seier Eriksen.

Ein fast tradisjon for mange

Vertskapet på fyret kunne stadfesta at Ryvarden er eit stort trekkplaster for folk i nabokommunane. Fleire av dei frammøtte som Vestavind snakka med fortalde at dei anten hadde hytte i Sveio eller var invitert av familie og kjente i Sveio. 

For mange er påskeeggjakt på Ryvarden blitt ein fast tradisjon, slik som for søskena Amelia og Sofie Studsvik frå Haugesund, med familie frå Sveio som inviterte til besøk. 

Amelia og Sofie Studsvik (lilla jakke) saman med Mathilde og Gulla Bruland frå Haugesund. For Amelia og Sofie er det ein tradisjon å besøka Ryvarden i påska, medan Mathilde og Gulla var med for første gong.
nyhende påskeeggjakt palmesøndag ryvarden kulturfyr sveio
Powered by Labrador CMS