nyhende
Du er ein del av beredskapen
Kommande veke er det fokus på eigenberedskap i heile landet. Kor godt budd er du på ulike kriser? Tema for årets eigenberedskapsveke er å øva.
– Kommunen har ansvar for å ta vare på sine innbyggjarar, men den enkelte har også ansvar. Du er ein del av totalberedskapen i Noreg. Ikkje for å gjera nokon urolege, men situasjonen i Europa er meir uføreseieleg enn på mange år med krigen i Ukraina og no det som skjer på Gaza seier Bjarne Hetlesæter, beredskapskoordinator i Sveio kommune.
– Og me får stadig meir ekstremvêr som til dømes kan medføra at straumen kan bli vekke over lengre tid. Er du budd på å klara deg tre dagar utan straum? Noko av det viktigaste med Beredskapsveka er å minna oss alle på å vera meir bevisste, seier ordførar André Mundal Haukås.
Viktig å øva
– Kvar bør den enkelte gjera?
– Øva er temaet for årets beredskapsveke, og det bør alle gjera. Gjerne eit par gonger i året slik at ein veit kva ein skal gjera om det blir alvor. På DSB sine nettsider sikkerhverdag.no finn du ulike forslag til øvingar. Har du barn, er det viktig å forklara dei kvifor ein øver utan å skremma dei, seier Hetlesæter.
Å gå gjennom lista over kva ein treng for tre dagar, er også ei nyttig øving. Dei fleste har sannsynlegvis mykje av det som står på lista i hus allereie. Då kan det vera ein idé å tenka over om ein bør samla det på ein fast plass, til dømes i eit skap på kjøkkenet, i boda eller i ein beredskapsboks.
– Å halda hovudet kaldt og hjarta varmt gjeld også her. Dersom du har eldre personar i familien eller ein eldre nabo, ta ein tur og sjå til at dei har det som trengs i hus i høve til lista. Og skulle straumen gå og du veit om folk som då blir utan oppvarming, inviter dei heim, seier Haukås.
Om straumen går
I dag er det mange bustadar som berre har straum som oppvarming. Me bur i ein del av verda der det fort kan bli kaldt om straumen blir vekke ein dag eller tre. Og korleis skal ein få laga mat? Det er difor viktig å tenka gjennom korleis ein løyser dette.
– Har du ikkje vedfyring, er det gode gassomnar å få kjøpt som gir rask varme. Eller kanskje du har ein i naustet eller på hytta som kan brukast. Tenk over kva rom du vil varma opp, og bruk det til opphaldsrom for husstanden. Å ha eit nødstraumsaggregat som går på diesel eller bensin og kan køyrast i korte periodar, er heller ikkje dumt. Det kan vera nok til å berga til dømes det som ligg i fryseboksen, seier Hetlesæter.
Matlaging
Har du gassgrill, er det lurt å ikkje venta til neste sesong med å kjøpa ny gassflaske om den begynner å bli tom. Det same gjeld for kokeapparat og turutstyr som går på gass og kan brukast til matlaging. Då har du det som trengs for å laga mat om du ikkje har ein vedomn.
Om ikkje noko av dette er mogeleg for deg, er det lurt å ha ein avtale med naboar, familie eller kjende at du kan koma dit om straumen blir vekke ein lengre periode.
Me er velsigna med stabil straum i Noreg, og dermed tenker me ikkje så ofte på kva som skjer om den blir vekke. Ein stor del av kommunikasjonen i dag skjer via mobil og pc. Å ha liggande ein opplada batteribank eller to er difor lurt.
Er du innom biblioteket, finn du både ei utstilling og informasjon du kan ta med deg.
Er du budd om noko skulle skje? Her finn du ulike øvingar.
