nyhende
Formannskapet tilrår solkraft-konsesjon:
Droppa krav om kulturminnegransking
Eit samla formannskap i Sveio tilrår i ei høyringsfråsegn av Nesse solkraftverk får konsesjon, men med føresetnader som er lista opp i seks punkt.
NVE må klargjera og vurdera korleis innovative løysingar kan sikra at fotavtrykket blir minimert. Vidare må NVE sikra at minimalt med skog og landbruksareal blir teke ut av funksjon eller får redusert verdi, og at landbruksinteressene blir ivaretekne.
Det må etablerast løysingar som medverkar til at området framleis kan vera atteraktivt for friluftsliv. Vassdrag og bekker må sikrast omot erosjon og utvasking. Det skal gjennomførast kontroll med vassprøver både i og etter anleggsfasen for å sikra minimal miljøpåverknad. I det siste punktet blir det kravd at bygginga blir gjort på ei årstid der det blir teke omsyn til vegar, dyreliv og hekking.
Frykta utsetjing
Uttalen er stort sett i samsvar med rådmannen si tilråding, men formannskapet valde å ta ut eitt punkt i tilrådinga der det heitte at det måtte gjennomførast kulturminneundersøkingar før utbygginga startar.
Asle G. Halleraker (TvF) var den første som reagerte på kravet om kulturminneundersøkingar. Han meinte dette ville forseinka prosjektet.
Også Jarle Jacobsen (KrF) reagerte på det foreslåtte kravet om kulturminneundersøkingar, då mesteparten av anlegget skal byggjast oppå marka. Han spurte også om grunneigaren fått eit tilsvarande krav om det var snakk om eit dyrkingsprosjekt.
Bekymra for vegen
Jacobsen hadde også ein merknad til det siste punktet som blei vedteke, om omsyn til vegar, dyreliv og hekking.
– Det viktigaste er vel at vegen blir sett i stand etter at utbygginga er gjennomført, sa han.
Konsekvensane for vegen er nettopp det som naboane har vore mest bekymra for. Ordførar André Mundal Haukås (H) sa seg nøgd med at naboane elles har stilt seg positive til det planlagde solkraftverket.
