Digitale sprell i kulturskule

Kulturskulelærar i Sveio, Martin Mason, har teke i bruk digitale verktøy for å nå elevane sine, grunna korona-epidemien.

– Eg synest elevane er tøffe som stiller opp på noko så uvant som ein gitar- eller pianotime via eit nettbrett. Nemnast må også engasjerte foreldre som i ein hektisk kvardag hjelper til, blant anna med å stilla som provisorisk «kameramann» ved halda nettbrettet over tangentane til sine håpefulle, fortel kulturskulelæraren.

Pause i samspelet

I følgje Mason har dei fleste elevane teke imot tilbodet om ein digital variant av undervisning. Korleis det praktisk har blitt løyst har vore litt opp til den enkelte lærar. Sjølv underviser han i gitar/bass/piano digitalt, vanlegvis også band-undervisning, men dette blei for vanskeleg å gjennomføra digitalt. Dei eldste elevane har nytta sine Chromebook datamaskinar via skulen, og dei fleste har fått til ei eller anna digital løysning som FaceTime, Zoom, Google Hangouts eller Skype.

– Det er ikkje til å koma forbi at det er ein del utfordringar når det kjem til musikk og digitalisering. Blant anna er det ikkje mogleg å få til samspel, det blir for mykje lyd-forseinkingar, og ein kjem ut og køyrer på rytme. Det kan også vera detaljar i spelet og dynamikken som kan vera vanskeleg å få tak i. Me opplever også at el-gitar/bass vrengjer lyden fordi det blir for høgt for mikrofonane, men me klarar å høyra og gje tilbakemelding på ein del likevel, forsikrar Mason.

Komposisjons-prosjekt

I løpet av korona-tida blir det også jobba med ein låt – eit felles komposisjonsprosjekt.

– Planen er at elevane sender snuttar til meg på e-post, mi oppgåve blir å samla og spela dette inn i heimestudioet mitt. Forhåpentlegvis resulterer dette i ein song til slutt, fortel læraren engasjert. Han har tru på at det er bra å halda litt på dei «vanlege» rutinane no i denne spesielle tida.

– Mange set pris på å ha ein person å snakka litt med, eg kjenner for eigen del at det er godt å kunne halda kontakten rett og slett berre for å høyra korleis det går. Men, når det er sagt, alle seier dei gler seg veldig til å koma på skulen igjen, dei er lei av berre å vera heime, medgir Mason. Også han gler seg til kulturskulen igjen kan opna som vanleg, samstundes som han ser at det gjerne er nokre smittevern omsyn som kan gjera det vanskeleg enda ei tid framover.

– Spel, syng og dans!

Kultursjef Pål Jøsok påpeikar at det er ikkje alle faga det er like enkelt å digitalisera, og det er ikkje til å leggja skjul på at det krev mykje av både lærarar, elevar og føresette å gjennomføra digital undervisning.

– Eg håpar de har høve til å nytta tida heime til å spela, syngja, dansa, måla, teikna og leika – og ta vare på dykk sjølve og dei rundt dykk, oppfordrar Jøsok. Han minner samstundes om tilbodet vidare: Vil du vera elev i kulturskulen skuleåret 2020/2021? Påmelding for neste år kan gjerast på sveiokulturskule.no