Dette krysset kan få ny løysing

Det går fram av oversikta til fylkeskommunen over kva vegprosjekt som skal lysast ut i Vestland fylke i år.

– Det opna seg ei moglegheit for finansiering av prosjektet, då styringsgruppa i Haugalandspakken har sett av 32 millionar 2024-kroner til tiltak for trafikksikring og kryssutbetring i Sveio i samanheng med den forlenga Haugalandspakken, skriv seksjonsleiar for utbygging vest, Andreas Kolås, i Vestland fylkeskommune i ein e-post til Vestavind.

Tidleg i prossesen

Ifølgje seksjonsleiaren skal fylkeskommunen avklara kva løysingar ein ønskjer å gå for ved det noverande krysset saman med Sveio kommune, før sjølve prosjektet blir lyst ut.

– På noverande tidspunkt held me på med prosjektering og optimalisering. Det er derfor for tidleg å visa skisser eller illustrasjonar av korleis krysset kan bli, og korleis trafikkavviklinga blir, held seksjonsleiaren fram.

Ifølgje Kolås er målet å lysa ut anbodskonkurransen, og at styringsgruppa tek endeleg stilling til prosjektet i løpet av året.