– Det er mange som er sjuke no

– Det er mange som er sjuke no, og det er hovudsakleg luftvegsinfeksjonar som dominerer. Influensavirus, koronavirus og respiratorisk-syncytialt virus (rs-virus) er det me ser mest av, seier kommuneoverlegen.

Samtidig peikar ho på at det også er omgangssjuke i omløp.

Ifølge tal frå Folkehelseinstituttet har 72,8 prosent (850 personar) av innbyggarane i Sveio som er 65 år og eldre teke influensavaksine denne sesongen. I same aldersgruppa har 36,6 prosent (427 personar) teke koronavaksine. 

Begge vaksinene blir tilrådde til alle personar i ulike risikogrupper. Influensavaksinen blir i tillegg tilrådd til alle over 65 år, medan koronavaksinen blir tilrådd til alle over 75 år.

Teikn til betring 

Møksvoll fortel at det har vore auka press på legekontora i januar og i starten av februar, men at trenden kan sjå ut til å snu.

– Me har hatt ei rolegare veke på Sveio legekontor denne veka. Det kan jo vera eit teikn på at det roar seg litt, seier ho.

Ifølge kommuneoverlegen er det smitte i alle aldersgrupper, men ho opplever at det merkast best blant dei yngste. Samstundes trur ho vaksinasjon kan vera ein del av forklaringa på at dei mest sårbare er betre skjerma denne vinteren.

– Vaksinasjonsprogrammet for vaksne blei innført hausten 2025, og den første sesongen ser ut til å ha fungert godt. Det har gitt viktig vern av sårbare grupper, seier ho.

Dei enkle grepa

Møksvoll ber folk ta dei enkle grepa som kan bremsa smitte, både heime, på jobb og i skule og barnehage.

– Det er viktig med god handhygiene, og å vaska seg med såpe og vatn. Host og nys i olbogen eller i papir, og hald deg heime ved feber og dårleg allmenntilstand. Ved omgangssjuke blir det tilrådd at ein held seg heime til ein har vore symptomfri i 48 timar, seier kommuneoverlegen.