nyhende
Brannutstyr frå Sveio på veg til Ukraina
Ein ryddedugnad på Sveio brannstasjon resulterte i eit bra bidrag til Haugaland brann og redning si hjelpesending til kolleger i Ukraina.
I juni i fjor vedtok kommunestyret at det skal byggast ny brannstasjon til om lag 44 millionar kroner i Sveio sentrum. Her skal det også vera samlokalisering med tilsette innan vatn, avløp, veg og kyrkje.
— Me skulle ha rydda uansett i samband med ny brannstasjon. Så kveldsdugnaden måndag vart ein tidleg start på dette, samstundes om me kunne gje brukbart utstyr til Ukraina-innsamlinga, seier Tore Johann Enerstvedt, utrykningsleiar Sveio stasjon.
Kjem til nytte
Ein del ting blei sortert ut og kasta, men det blei likevel ei bra liste med utstyr som brannkolleger i Ukraina får nytte av. Mellom anna
- UHF radiosamband
- Ullteppe
- Førstehjelpsutstyr
- Redningsvestar
- Regntøy
- Brannbekledning (til ca 15 personar)
- Brannhjelmar
- Bårer
- Brannslangar
- Strålerør
- Grenrør
- Brannslokkeapparat
- IR kamera
- Vestar
- Sugeslangar
- Bærbar pumpe
- Med meir
Dei som var med på ryddeaksjonen i tillegg til Enerstvedt var Silje Kvalvågnes, Siren Rossebø, Åshild Haugsgjerd og John Anders Semb, alle frå Sveio brannstasjon.
— Brannsjef Dag Botnen kom med skapbil frå Haugesund og henta utstyret, seier Enerstvedt.
Brannbil frå Sveio
Han har fått med seg at Vestavind publiserte ei sak om innsamlinga til Haugaland brann og redning på nettavisa måndag. Utstyret skal etter planen sendast i morgon.
— Biletet til saka er av tre brannbilar. Den til høgre har faktisk vore i bruk i Sveio frå den blei kjøpt i 1996. Den var på Sveio brannstasjon fram til rundt 2008. Då vart den flytta til Førde og gjorde teneste der til 2022, fortel Enerstvedt.
