nyhende
Bøndene meir positive til eiga lønnsemd
Bøndene har vorte meir positive til lønnsemda på eigen gard, viser ei ny undersøking. Men fleirtalet meiner framleis at lønnsemda er for dårleg.
I 2023 svarte 32 prosent av dei spurde at lønnsemda var veldig eller ganske bra. No meiner 41 prosent det same, går det fram av Landbruksbarometeret 2025.
Likevel meiner framleis fleirtalet av deltakarane i undersøkinga – 54 prosent – at lønnsemda er ganske eller veldig dårleg, skriv Nationen.
* Det er svineprodusentane som er mest nøgde med eiga lønnsemd. Heile 67 prosent av desse svarer at lønnsemda er veldig eller ganske bra.
* Nesten like mange av grøntprodusentane, utanom korn – 66 prosent – og 63 prosent av egg- og fjørfeprodusentane, er nøgde med lønnsemda.
– Skal folk få nok norsk mat òg i framtida, må bonden ha tryggleik for morgondagen og trua på framtida. Det ser vi heldigvis at fleire no byrjar å få, seier Bjørn Gimming, leiar i Norges Bondelag, i ei pressemelding.
* Berre 19 prosent av grasprodusentane meiner lønnsemda er ganske bra, medan 71 prosent har svart ganske eller veldig dårleg.
* Hos skog-/tømmerprodusentane har 31 prosent svart ganske bra, medan 63 prosent har svart ganske eller veldig dårleg.
* 61 prosent av kornbøndene er misnøgde med lønnsemda.
Det er Agri Analyse som står bak Landbruksbarometeret saman med Norges Bondelag, Norges Skogeierforbund, Innovasjon Noreg, Norsk landbrukssamvirke, Landkreditt Bank, og Felleskjøpet Rogaland Agder. Barometeret blir gjennomført annakvart år.
(©NPK)
