Blir anbefalt å takka nei til prosjekt som vil skapa vekst og verdiskaping

Oppdatering til slutt i saka

Prosjektet er kalla Attraksjon Sunnhordland, og er tenkt å vera eit samarbeid mellom Samarbeidsrådet for Sunnhordland, som representerer kommunar både politisk og administrativt, og Atheno på næringslivssida.

Tanken er å byggja på dei fortrinna regionen har i dag og, utvikla nye bedrifter med utgangspunkt i desse. Eit hovudfokus er å trekkja til seg investeringar ved å marknadsføra regionen betre og meir samordna.

Klart flest på Haugalandet

For Sveio kommune er det viktig at det blir skapt arbeidsplassar både i Sunnhordland og på Haugalandet. Statistikk viser at 1204 sveibuar pendlar til kommunar på Haugalandet, medan 191 pendlar til Sunnhordlandskommunane – 142 til Stord.
Sveio er dermed tettare på arbeidsmarknaden på Haugalandet enn i Sunnhordland, oppsummerer rådmannen i sakspapira.

I juni sa formannskapet i Sveio kommune ja til å bli med på forprosjektet, på vilkår om at det skulle avklarast korleis Haugalandsregionen kunne inkluderast i hovudprosjektet.

Ikkje gode nok svar

No har rådmannen konkludert med at forprosjektet ikkje har gitt gode nok svar på kva Attraksjon Sunnhordland konkret skal jobba med for Sveio sin del, utover å marknadsføra Sunnhordlandregionen som etablerarstad.

Deltaking i eit slikt prosjekt vil kosta deltakande kommunar mellom 125 000-150 000 meir årleg til næringsutvikling. Rådmannen ser heller at ein slik sum blir brukt til ei prosjektstilling som skal jobba med næringsutvikling og sal av Sveio som bukommune.

Ingen tok ordet i saka då formannskapet hadde saka oppe til vurdering måndag kveld. Alle stemte for rådmannen sitt forslag om å avslutta arbeidet.

Kommunestyret tar endeleg avgjerd i møte måndag 2. november.

2. november 2020: Eit samla kommunestyre vedtok å seia nei til vidare deltaking i prosjektet. Det var ingen diskusjon rundt saka.