nyhende
— Bli med og bli inspirert
Er du engasjert i velforeiningsarbeid, nærmiljø, arbeid med barn og ungdom, eldre, integrering, eller er du med i utval eller ulike verv? Då er du velkomen til gratis konferanse i Tysværtunet i helga.
— Me inviterer Sveio sine innbyggarar, frivillige og tilsette til å delta på «Frivillighetskonferansen #egermed» fredag 17. og laurdag 18. februar. Konferansen er gratis, og her er det veldig mange nyttige og gode foredrag og workshops å få med seg, seier Grethe Vangsnes, dagleg leiar i Frivilligsentralen i Tysvær.
Program og gratisbillettar
Konferansen er open for alle på Haugalandet, og du tar ut gratisbillett til det du har lyst til å gå på. Programoversikt og billettar finn du her: https://www.tysvertunet.kulturhus.no/kulturprogram/. Du kan også berre møta opp, men då kan det vera at det du har lyst til å få med deg er fullbooka. Det er derfor lurt å sikra seg billett.
— Dette er ein fin arena for frivillige og tilsette å delta på saman. Som for eksempel ALLEMED og Frivillighet Norge sin inkluderingsworkshop der ein finn løysingar saman for å inkludera barn, unge og vaksne med minoritetsbakgrunn, seier Vangsnes.
Pust i bakken
I mingleområdet kan du ta ein pust i bakken, steika deg ein vaffel, drikka ein kopp kaffi, snakka med andre, ta med PC for å jobba eller berre slappa av. Her kan du vera uavhengig om du går på foredrag eller ikkje, eller du kan slappa av mellom øktene du vil delta på.
