nyhende
Ber om møte med justisministeren
Sveio-ordførar Linn Therese Erve (Ap) møtte saman med sine kollegaer på Haugalandet fredag leiinga i Heimevernet og politiet i Sør-Vest politidistrikt i dag for å drøfte den lokale sikkerheitssituasjonen.
I møtet, som var i regi av regionrådet Haugaland Vekst, gjorde Heimevernet og politiet greie for at om konfliktnivået knytt til krigen i Ukraina aukar, så treng dei meir folk og utstyr.
— Har kontroll
I møte innleia leiar for HV08 (Agder og Rogaland), Øystein F. Nilsen stabssjef i Sør-Vest Politidistrikt, Håkon Lomsdal Strand.
— Dei forsikra om at slik status er i dag, så har dei kontroll på situasjonen, heiter det i pressemeldinga.
Men dei opplyste vidare at om det blir ei auke i konfliktnivået, så vil dei ha behov for meir mannskap og utstyr.
Ber om møte
Regionrådet vedtok at kommunane på Haugalandet i samarbeid med distriktsrådet for Heimevernet, HV08 og politiet skal skrive eit brev til justisministeren, for å be om eit møte for å drøfte behovet for meir mannskap og utstyr ved eit eventuelt auka konfliktnivå.
Det har tidlegare vore meldt om observasjonar av mogelege framande drone både ved gassprosesserings-anlegget på Kårstø og ved lufthamnene i Haugesund og Stavanger.
Hendinga med sabotasje mot gassrøyrleidninga i Østersjøen nyleg gjer at norske myndigheiter har auka oppsynet ved slike anlegget i Nordsjøen.
Tar situasjonen på alvor
Sveio-ordføraren seier til Vestavind at ein på møtet drøfta tryggleiken kring dei viktige anlegga som finst på Haugalandet Og at ho kjenner seg trygg på at dei som er sett til å ivareta tryggleiken har god kontroll på situasjonen per i dag.
Men legger til at sikkerheitssituasjonen i Europa, med krigen i Ukraina som bakteppe, er noko ein skal ta på alvor. Difor går også Sveio kommune for tida gjennom sine beredskapsplanar.
— Eg trur alle kjenner på at me lever i ekstraordinære tider, seier ho til Vestavind.
— Opplev dykk i kommunen auka uro blant innbyggarar i Sveio?
— Ikkje noko spesielt utover det me nok alle kjenner på, om ein er politikar eller ein vanleg innbyggjar. Så er det viktig å presisere at det ikkje ligg føre nokon konkret trussel no, og at innbyggarane skal vere trygg på at det er kontroll på situasjonen lokalt, seier Erve.
