nyhende
Både kjøpte og selde eigedom
Kommunestyret godkjente måndag kjøpet av gardsnummer 121, bruksnummer 5 i Førde, altså gardsbruket der Gjenbruksløa ligg.
Kjøpesummen er sju millionar kroner pluss omkostningar. Kjøpet blir finansiert med opptak av lån. Kommunen kjøper garden i første omgang for å skaffa tomt til ny brannstasjon, men sikrar seg samstundes eit stort areal til andre føremål.
På det same møtet godkjende kommunestyret sal av 115 dekar på det tidlegare sendarområdet på Tjernagel til Sigurd Aase for 12,3 millionar kroner. Føremålet er næringsutvikling knytt til akvakultur.
Begge transaksjonane blei godkjende samrøystes og utan debatt i kommunestyret. Vestavind skreiv i sist veke at også Hiernagla Brenneri AS på Ekrene har vore interessert i ein liten del av det området som Sigurd Aase no har kjøpt.
Ordførar André Mundal Haukås seier kommunen har hatt kontakt med begge partar og håpar det også ordna seg med tomt til Hiernagla.
Reidar Horneland i Hiernagla Brenneri AS stadfestar også kontakt, men seier dei enno ikkje har diskutert kjøp av tomt med Aase.
