nyhende
Astrid har fått spennande jobb i regjeringsapparatet
Astrid Bergmål blei svært overraska då ho fekk spørsmål om å bli statssekretær for justisminister Emilie Mehl. Den utflytta sveibuen fortel det likevel var lett å takka ja.
– Eg har stor tru på denne regjeringa og føler meg privilegert som får lov til å vera med som statssekretær, seier Astrid Bergmål.
Utnemninga skjedde i statsråd på Slottet. Like etter blei dagane sterkt prega av drapa som skjedde i Kongsberg.
– Slik er det i Justisdepartementet, og det var eg bevisst på då eg takka ja, seier 40-åringen.
Førebudd på hektiske dagar
Bergmål fortel det ennå gjenstår å sjå korleis arbeidsdagane blir framover, og om det blir stor overgang frå jobben som leiar i Virke Reiseliv.
– Det er hektiske dagar i justisdepartementet, samstundes har det også vore travelt å jobba i Virke Reiseliv, særleg det siste halvanna året med pandemi. Men eg trivst med å jobba, så det skal nok gå bra. Og så er eg heldig som har veldig snille foreldre (Mai Lise og Olav Bergmål, jour. anm.) som hjelper oss med å få det til å gå rundt på heimebane. Det er eg veldig takksam for, seier den nye statssekretæren.
Jurist
Astrid Bergmål er utdanna jurist og brukte eit år av studiane i Frankrike, der ho mellom anna jobba med menneskerettigheitar i Europarådet. I 2011 blei ho heiltidspolitikar som politisk rådgjevar i justisdepartementet og seinare for Arbeidarpartiet si stortingsgruppe. I september 2018 hoppa ho over til privat næringsliv som leiar i Virke Reiseliv. No er ho altså tilbake i regjeringskvartalet.
