Arbeidet med gravplassen har starta

I juni 2020 skreiv Vestavind at talet på ledige gravplassar ved Eikeland kapell minka raskt, og ein rekna med at det var nok plassar ut 2022. På den utvida gravplassen skulle det opparbeidast 200 nye plassar. Og det var håp om anleggstart like over nyttår.

Eit år seinare kunne Vestavind fortelja at planane no var godkjent og gravplassen skal fornyast. I planane var også ny parkeringsplass. Byggestart var pårekna på nyåret 2022, og kostnadsramma var 5,69 millionar kroner.

I august 2022 vart det kjent at arbeidet blir forseinka nok ein gong. Sveio kommune hadde fått inn fem tilbod på utviding av gravplassen, og alle låg over budsjettet. Saka måtte difor opp til politisk behandling. Saka blei behandla i kommunestyret 26. september, og der gjekk dei inn for ei kostnadsramme på 9,63 millionar kroner.

Begynte måndag

Måndag denne veka starta endeleg Vassbakk & Stol arbeidet med utvidinga av gravplassen. Faktisk to veker tidlegare enn det som var planlagt. Ei gravemaskin var i full gang med å fjerna jorda over fjellgrunnen.

I hovudsak er det dei som er busett i Auklandshamn som brukar denne gravplassen. I snitt har det etter år 2000 vore fem gravferder årleg på Eikeland.

Den eksisterande gravplassen, som blei tatt i bruk i slutten av 1950-åra, blei planlagt for 350 graver. Det skuldast at arealkrava den gongen var mindre enn i dag. No krev kvar grav 4,5 kvadratmeter, før var det nok med 2,88. Djupna må vera minst 1,6 meter ned til fjell.

204 nye kistegraver

Den utvida gravplassen gir plass til om lag nye 204 kistegraver og 11 urnegraver. I tillegg kjem ein minnelund for 52 urnegraver i nordaustre hjørnet.

Kor lenge utvidinga vil dekka behovet er avhengig av gravferdstradisjonar. Det er anslått av dette vil halda i 50-60 år framover, om ein reknar med ei viss grad av gjenbruk av graver, og utan store endringar i tradisjonane.

Parkering er ei utfordring, og det skal det også gjerast noko med samstundes som gravplassen blir utvida. Sør for kapellet kjem det ny parkering med plass til 17 bilar.

Det skal også lagast ein ny prosesonsveg som bind saman kapellet, eksisterande gravfelt og nye gravfelt i nord. Området rundt kapellet skal rustast opp med fast dekke og innramming med gjerde.

Ferdig i løpet av januar

– Full anleggsoppstart blir det 14. august, og me legg opp til at heile området skal vera ferdigstilt til utgangen av januar 2024. Men om det kjem tidleg barfrost kan det vera at me på utsetta noko asfaltering og legging av ferdigplen. Området er dårleg opplyst, og me har også fått inn fire nye gatelys i prosjektet i samarbeid med Vestland fylkeskommune, seier prosjektleiar Per Riise i Sveio kommune.

– Første gong Vestavind skreiv om at det kjem ny gravplass blei det sagt at ein håpa på anleggstart like over nyttår 2021. Prosjektet har teke si tid?

– Det har dukka opp ulike ting undervegs, men det er særleg søknadsprosessen opp mot fylkeskommunen som har teke uforholdsmessig lang tid.

3.300 kubikkmeter sprengstein

I og med djupa til kistegravene er minimum 1,6 meter, må det sprengast vekk ein god del stein.

– På gravplassen skal det sprengast om lag 2.300 kubikkmeter fast masse. På parkingsplassen i sør skal det sprengast vekk om lag 1.000 kubikkmeter, seier Riise.

Ein meir kortreist og miljøvenleg bruk av sprengsteinen kan det knapt bli. Den skal flyttast rett over på andre sida av vegen der grunneigaren skal bruka den til å utvida beite.

– Eg vart veldig, veldig glad

Ein som er glad for at arbeide endeleg er i gang, er leiar i Valestrand og Førde sokneråd, Tor Helge Hardeland.

– Eg har vore med i soknerådet i 14 år, og dei hadde byrja å snakka om ny gravplass før mi tid. Men det er først dei siste tre-fire åra me har jobba mykje med saka. Etter kvart som det minka på gravplassar, og prosjektet stadig vart utsett, begynte me å bli uroa. Derfor vart eg veldig, veldig glad då eg høyrde skraping mot stein i sjutida måndag morgon. Eg sende SMS til fleire i soknerådet, og den første tilbakemeldinga var Hurra! og to flagg, fortel Hardeland.

Han var borte på kyrkjegarden både måndag og tysdag.

– Han som grev gjer ein veldig fin jobb. Det mykje som skal gjerast etter det, men no kan me endeleg sjå fram til å få både fleire gravplassar og eit veldig flott område, seier Hardeland.