nyhende
2,3 millionar kroner til anlegg i Sveio
Årets spelemidlar er fordelte til kommunar, lag og organisasjonar i fylket. Av totalt 258 millionar kroner fekk Sveio 2,3 millionar.
Hovudutval for kultur, idrett og inkludering i Vestland fylkeskommune fordelte spelemidlane i møtet 28. mai. Spelemidlane er del av overskotet til Norsk Tipping og går til både ordinære anlegg og nærmiljøanlegg, altså anlegg som legg til rette for eigenorganisert aktivitet nær der folk bur.
– Spelemidlane er avgjerande for å få bygd gode både små og store anlegg, som kjem innbyggjarane i fylket til gode. Her snakkar vi store idrettsanlegg som symjehallar og idrettshallar, men også dei viktige nærmiljøanlegga. Det kan vere ballbingar, sykkelløyper og diskgolfanlegg, mindre anlegg som er svært viktige for blant anna fysisk aktivitet, integrering og folkehelse, seier Jacob Nødseth, leiar for hovudutvalet i ei pressemelding.
Mest til Sveio Golfpark
Sveio sin del av den totale fylkespotten er mindre enn ein prosent og utgjer totalt 2,3 millionar kroner. Sveio Golfpark får største del av dette med 795.000 kroner til to prosjekt.
Desse ordinære anlegga fekk midlar:
- Nesheim-Hovda-Buavåg tursti, Sveio kommune, 301.000
- Sveio Golfpark, lager, Haugaland Golfklubb, 500.000
- Sveio Golfpark sanitæranlegg, Haugaland Golfklubb, 295.000
- Nipaståvo dagsturhytte, Sveio kommune, 485.000
Golfståvo dagsturhytte Sveio kommune, Nipaståvo – Gulfståvo tursti, Sveio kommune og Auklandshamn orienteringskart, Sveio orienteringslag hadde også søknader inne, men fekk ikkje innvilga desse.
Nærmiljøanlegg
- Sveio sentrum, skatepark, Sveio kommune, 300.000
- Sveio skule, ballbinge rehab, Sveio kommune, 119.000
- Sveio skule 5er bane Sveio kommune, 300.000
Sveio kommune hadde også søkt om midlar til Førde skule, buldrevegg, Førde skule, super fitnessområde og Sveio skule, utandørstrening, men desse prosjekta blei ikkje tildelt midlar.
