nyhende
20.000 mistar dagpengane fredag
Dei neste to månadene vil 26.400 personar miste dagpengane sine, når dagpengane under koronapandemien stansar.
Frå 1. april mistar rundt 20.000 arbeidssøkjarar dagpengane sine, medan det i april og mai skjer det same med ytterlegare 6.000, opplyser Nav i ei pressemelding.
Etter kvart som koronarestriksjonane har stansa, er òg mange permitterte komne tilbake i jobb – anten heilt eller delvis.
Av dei 26.400 personane som no mistar dagpengane, er 10.600 permitterte, medan 15.800 er det ikkje.
– Det vil seie at seks av ti som no mistar dagpengane, er vanlege arbeidssøkjarar, og dei fleste av dei har verken ein arbeidsgivar som dei kan vende tilbake til, eller ei tilknyting til arbeidslivet, seier statistikksjef i Nav, Ulf Andersen.
Normalt er det årleg rundt 12.000 arbeidssøkjarar som går ut heile dagpengeperioden sin.
Raudt foreslo å forlengje dagpengeordninga til ut juni, men fekk torsdag inga støtte frå nokon av partia, med unntak av Pasientfokus» eine representant.
– Det er veldig skuffande at dei andre partia ikkje vil sikre korona-ledige ein trygg veg tilbake til arbeidslivet. Tusenvis vil i tida framover miste dagpengane sine, alternativet for dei blir sosialhjelp og fattigdom, seier Raudts Mimir Kristjansson.
(©NPK)
