166 medier har søkt koronastøtte

– Me tar sikte på ei rask saksbehandling, og målet er å utbetala støtte i månadsskiftet august-september, opplyser Mari Velsand, direktør i Medietilsynet.

Medietilsynet kjem til å berekna støttebeløpet til dei ulike medieverksemdene basert på den økonomiske informasjonen mediene no har sendt inn. Den økonomiske ramma til fordeling som er bevilga av Stortinget er på 300 millionar kroner.

Det er 79 aviser som har søkt om kompensasjon. Vestavind er blant avisene som har søkt om koronastøtte.

– For lokalavisene handlar det om tapte annonseinntekter. Me kan få erstatta inntil 60 prosent av inntektene me kunne hatt mellom 15. mars og 30. juni, men som no er å rekna som tapte på grunn koronaepidemien.

Ein kompensasjon vil koma til god nytte i Sveio-avisa, men overskott blir det truleg ikkje dette året.

– Me håpar sjølvsagt på størst mogleg utteljing, slik at me på sikt kan leggja 2020 bak oss utan dei store raude tala me såg føre oss tidlegare i vår, seier dagleg leiar og redaktør i Vestavind, Irene Flatnes Haldin.

4,9 milliardar i tilskot fram til no

For fire månadar sidan blei det opna for kompensasjonsordinga for næringslivet. Sidan har over 60.000 føretak med stort omsetnadsfall mottatt tilskot frå ordninga. Til saman har Skatteetaten utbetalt 4,9 milliardar kroner i tilskot så langt.

Ny kompensasjonsrunde

Føretak med betydeleg omsetnadsfall i juni og juli kan nå søka om tilskot frå kompensasjonsordninga for næringslivet.

– Fram til nå har ordninga behandla søknadar om tilskot for månadane mars, april og mai. I helga opna portalen for søknadar for juni og juli, opplyser Odd Woxholt, som er ansvarleg for kompensasjonsordninga for næringslivet i Skatteetaten. Han minner om søknadsfristen 31. oktober.