Open butikk, konkurssal og fest

Det fortel advokat Karl Anders Horneland på Stord, som er oppnemnd til bustyrar. På Valevåg Landhandel si facebookside skriv kjøpmann Per Magnus Grøsvik at konkurssalet startar klokka 10.00, og at Fred Helge Nappen med familie og vener skal spela opp til det han kallar aller siste dans i Valevåg.

Mange varer

Det var bladet Sunnhordland som først omtalte planane om sal av varelageret. Etter eit møte med Grøsvik onsdag stadfestar bustyraren overfor Vestavind at dette skal skje laurdag.

– Sidan det er snakk om ferskvarer, er det om å gjera å få selt varene så snart som mogleg. Og ved å gjera det på denne måten, trur eg me får meir pengar til buet enn om me skulle selt alt samla, seier Horneland vidare.

Han fortel at han gjekk gjennom butikken onsdag og noterte seg at det er ein god del varer i hyllene, og at det meste er innanfor utløpsdatoane. Mjølka i kjøledisken er for eksempel haldbar til 14. april, fortel han.

Dei einaste varene som ikkje blir selde til halv pris, er alkohol og tobakksvarer, understrekar Grøsvik i FB-meldinga si.

Når varene er selde ut, står det også igjen å selja butikkutstyr. Horneland trur ikkje mykje av dette tilhøyrer Nærbutikk-kjeden. Det må avklarast kva som eventuelt tilhøyrer eigedomsselskapet Valevåg Senter AS. Horneland fortel Grøsvik skal sondera litt for å finna ut om nokon kan vera interessert i driva daglegvarebutikk i Valevåg etter han. Ein person skal tidlegare ha vore inne på dette.

– Ryddig konkurs

Elles er dette ei svært ryddig konkurs. Det er utbetalt løn fram til 20. mars. Dermed står berre dei siste dagane fram til selskapet melde oppbod 2. april, pluss feriepengar for neste år. Ingen bankar har pant i varelager eller andre eignelutar, seier Horneland.

Det blir skiftesamling 8. mai i Haugland og Sunnhordland tingrett sine lokale på Stord. Kravet om oppbod blei behandla av tingretten same dag som det kom inn. Av orskurden går det fram at Valevåg Landhandel AS på det tidspunktet hadde ei gjeld på nær 800.000 kroner. Samstundes blei aktiva i form av varelager og kundefordringar stipulert til 570.000 kroner.

Det går også fram at selskapet hadde fem tilsette inkludert dagleg leiar. Per Magnus Grøsvik sa til Vestavind i samband med oppbodet at berre han og ein annan tilsett har vore på arbeid den siste tida.