Krigsveteran fyller 108 år

Torsdag 16. februar fyller den utflytta sveibuen Nils Severin Økland 108 år. Dagen skal feirast på Siljuslåtten sykehjem i Bergen, der jubilanten har budd sidan sommaren 2021.

Nils Severin Økland si livshistorie blei allment kjent då han i 2020 debuterte som forfattar med sjølvbiografien «Aldri gi opp». Boka skreiv han saman med dottera Bjørg Elin Økland. Tittelen kjem av ei oppfordring mora ofte kom med. Boka er gitt ut av Sveio Kystlag og har kome i to små opplag.

I sjølvbiografien fortel Nils Severin om barndom og oppvekst på Eikeland i Auklandshamn, om dei dramatiske krigsåra og om åra som sjøkaptein og familiemann etter krigen. Saman med ein bror og ein fetter rømde Nils Severin til Shetland i ein skrøpeleg motorbåt i 1941. I Storbritannia utdanna han seg til skyttar og tenestegjorde som skyttar på ni skip fram til 1945. Mellom anna var han med på den allierte frigjeringa av Normandie og resten av Frankrike i 1944. Han overlevde ei torpedering i Nord-Atlanteren og er etter krigen tildelt Krigsmedaljen, Deltakar medaljen 9. april 1940 - 8. mai 1945, Haakon VIIs 70-årsmeldalje, Regjeringa si minnemedalje, Convoy Cup Foundation, Camp Norway Foundation-medaljane, den franske Æreslegionen og fleire britiske utmerkingar.

Etter at han stifta familie på 1950-talet, har Nils Severin budd i Bergen. Han har to barn, ein son og ei dotter. Kona døydde for ein god del år sidan. Etter dette blei Nils Severin buande åleine i huset sitt fram til han flytta på sjukeheim for snart to år sidan. Han er nå den nest eldste innbyggjaren her i landet.

Einar Vestvik