«Himmelfarta» til Trodlavassnipen

Over 150 tok turen til fjells på den årlege Trodlamarsjen i Valestrand.

Trodlamarsjen til Trodlavatnet og Trodlavassnipen blei arrangert av Valestrand idrettslag for 42. gong Kristi himmelfartsdag.

Over 150 personar frå heile regionen deltok på marsjen i fint og opplett turver. Ved Trodlavatnet venta det utdeling av premiar til dei yngste. Derifrå var det mange som tok turen heilt til topps på Sveios høgste fjell, Trodlavassnipen på 432 meter over havet.

Det venta pokalar til dei som hadde deltatt i 5, 10, 20 og 30 år. Nokre deltok for første gong, og blant dei mest erfarne var det deltakarar som var med for 38. gong. Det nærmar seg 40 år og ny pokal.

Turen startar og sluttar ved ungdomshuset på Kleivo, kor Valestrand ungdomslag hadde kafé.

Håvard Tvedte