Bli abonnent
Logg inn

kultur

– Det var ekstra stas at biletet av far kom på framsida av boka. Far (Nils Severin Økland) har det bra og har framleis livsglede og gler seg over mange fine tilbakemeldingar på boka si «Aldri gi opp», seier Bjørg Elin Økland. Her saman med sonen Anders på ein liten privat «boklansering» i fotostudioet til Arne Årseth t.v.
– Det var ekstra stas at biletet av far kom på framsida av boka. Far (Nils Severin Økland) har det bra og har framleis livsglede og gler seg over mange fine tilbakemeldingar på boka si «Aldri gi opp», seier Bjørg Elin Økland. Her saman med sonen Anders på ein liten privat «boklansering» i fotostudioet til Arne Årseth t.v.

105-åring med røter i Sveio portrettert i ny bok

Alle er mykje meir enn berre det ein ser. Den nyleg utkomne boka «Hundreåringar i Vestland», bekreftar nettopp det.

Publisert Sist oppdatert

– Hundreåringar fortel om krig og kjærleik, lengsel, sorg og glede. Livsrøynsle kan du berre få ved å leva. Dei som har levd dei siste hundre åra på Vestlandet har mykje å fortelja, seier bokutgivar Arne Årseth.

Etter nesten to års arbeid er boka hans endeleg klar. Boka som var hans eigen idé, er produsert utan noko form for økonomisk stønad, og er trykt i 1 500 eksemplar.

Økland er med og prydar bokomslaget ilag med tre andre; Willy Mathisen og Mary Aasmul frå Bergen, og Kristina Fosse frå Bergsdalen. Til saman var dei 405 år og 85 dagar då dei blei fotograferte.Under kvart bilete inne i boka står det dato for fotograferinga, namn på personen, og kor mange år og dagar vedkomande er. Den eldste personen som er blitt portrettert i ord og bilete, er Solveig Hagen frå Frekhaug. Ho mangla berre tre veker på 109 år då ho blei fotografert, og var Noregs eldste då ho døydde.

Årseth har reist rundt i Hordaland og Sogn og Fjordane, det som no er nye Vestland fylke, og intervjua og fotografert 75 personar som alle er over 100 år. Boka er ein dokumentasjon på folk over hundre år ved fylkessamanslåinga, altså idet Sogn og Fjordane og Hordaland blei Vestland.

Sterke livshistorier

– Eg ønskjer å syna kor vakre og interessante eldre menneske er. Dessutan er det mange sterke livshistorier i boka, fortel Årseth, busett i Alversund i Nordhordland.

Ein av dei han vil trekkja fram er den pensjonerte sjøkapteinen Nils Severin Økland på 105 år. Økland er fødd og oppvaksen i Sveio, men har budd i Bergen etter at han stifta familie. I dag er han Bergens eldste mann.

Hundre prosent ekte

– Nils Severin Økland blei fotografert søndag 8. mars i år, og var den siste eg fekk tatt bilete av før eg måtte ta ein pause grunna koronapandemien, fortel Årseth som går god for at alle bileta er hundre prosent ekte.

Nils Severin Økland har opplevd eit langt og innhaldsrikt liv. Boka presenterer litt av livshistoria hans.

– Personane er fotograferte med naturleg belysning, og utan den minste retusjering. Ikkje så mykje som eit einaste hårstrå er retusjert, dette gjer prosjektet enda meir dokumentarisk, og det set større krav til meg som fotograf, utdjupar Årseth.

Til dagleg driv han Studio Nordhordland, har vore profesjonell fotograf på heiltid i 35 år, og har i tillegg gitt ut ni bøker, i hovudsak om lokalhistorie.

Farsdagspresangen

Den offisielle bokpresentasjonen skulle etter planen ha vore på Bergen offentlege bibliotek 5. november, men blei avlyst på grunn av den spesielle situasjonen med korona.

Dotter til Nils Severin, Bjørg Elin Økland, fekk likevel sikra seg eit par signerte bøker, ei av dei skulle far hennar få i farsdagspresang.

– Det er interessant å lesa historiene til dei som har levd eit langt liv og vakse opp i eit svært forskjellig samfunn frå slik det er i dag. Her finst både alvor og humor og ord til ettertanke. Eg vil absolutt anbefala denne boka, seier Økland.
kultur
Powered by Labrador CMS