Bror Eivind Eriksen er død

Bror Eivind Eriksen blei fødd i Haugesund 10. juli 1950 og vaks opp i ein søskenflokk på fire, alle gutar. På farssida kom slekta frå Valevåg. Då ferjekaien i Valevåg skulle utvidast på slutten av 1970-talet, fekk Eriksen overta våningshuset som hadde vore ein del av handelsstaden som oldefar hans i si tid bygde opp. Eriksen flytta huset og bygde det opp igjen. Der budde han med familien sin i meir enn 40 år før han for få år sidan overlet det til ein av sønene.

Som 15-åring drog Bror Eivind Eriksen frå Haugesund til Sand, der han først gjekk på folkehøgskule og deretter på realskule. Etterpå gjekk vegen til den fireårige lærarskulen på Stord.

Lærar og lærebokforfattar

Den første jobben sin som nyutdanna lærar hadde han også på Stord. Deretter gjekk ferda til Sveio, der han altså busette seg i Valevåg og fekk lærarjobb ved Førde barne- og ungdomsskule der han blei verande i mange år. Seinare blei han rektor ved den same skulen. Innimellom arbeidde han som rådgjevar ved skulekontoret i Haugesund nokre år. Det er også verd å nemna at han hadde ein faglitteratur produksjon bak seg. Han var med på å skriva eit fleirbinds læreverk i norskfaget.

Eriksen hadde eit sterkt engasjement for menneska omkring seg, for bygdesamfunnet og ikkje minst for ungdommar som sleit og hadde det vanskeleg. Dei siste yrkesaktive åra sine brukte han til å byggja opp og leia kommunen sin barneverninstitusjon Sveio Bufellesskap på Lindøy.

Nestor i politikken

Samfunnsengasjementet medførte også eit tidleg politisk engasjement. Med ein borgarlege bakgrunn og ein onkel som i ti år var ordførar for Høgre i Haugesund, kom det kanskje som ei overrasking av Eriksen fann plassen sin på venstresida. Allereie som student på Stord blei han med i SV, og i Sveio var han med å starta partiet sitt lokallag i 1991. Sjølv var han medlem av kommunestyret frå 1999 til 2007 og markerte seg ikkje minst innan teknisk sektor.

– Tydeleg, men samlande, er ein karakteristikk som blir brukt om det politiske arbeidet hans.

Mellom ei rekke verv som Eriksen har hatt, kjem også 25 år som Sveio kommune sin representant i styret for Vestavind. Han gjekk ut av styret i 2022, men var ein trugen ven av lokalavisa heilt fram til sin og bidrog periodevis også med stoff til avisa.

Frå Lennon til mannskor

Eriksen var kulturinteressert. Han var nær ven av fleire forfattarar og ihuga fan og beundrar av John Lennon. Men også andre sjangrar hadde han sansen for. Då Valestrand mannskor blei skipa i 2013, fann han sin plass der. Seinast 14. oktober var han solist då mannskoret hadde konsert i Valestrand kulturkyrkje. Han var også med på øvinga den siste onsdagen i oktober, fortel korleiar Bjarne Hetleseter, som dermed understrekar at dødsfallet kom brått sjølv om Eriksen hadde slite med ulike helselplager i lang tid. Koret er spurt om å medverka i gravferda 12. november.

Arva interesse for segling

Sjølv med stort samfunnsengasjement og mange jern i elden, karakteriserer fleire av dei som kjende han godt Eriksen som ein svært familiekjær mann. Dette kom til uttrykk både overfor kjernefamilien og storfamilien i vid forstand. Valevåg var ein samlingsstad for heile Eriksen-familien, og Bror og kona var det sjølvsagde vertskapet. Fritida elska han å ta familien med på sjøen. Interessa for segling fekk han med seg frå barneåra; faren var også ein ivrig seglar og medverka til at han fekk bygd sin første optimistjolle. Eriksen avslutta seglkarriera si med ei Colin Acher-skøyte, som han måtte avhenda då helsa svikta.

Bror Eivind Eriksen etterlet seg kone og fem born med deira etterkomarar. Eldste sonen døydde for nokre år sidan.