Stor gjensynglede i barnehagane

Dei tilsette har hatt svært travle dagar og kort tid på å førebu gjenopninga. Rettleiaren for smittevern i barnehagar kom først onsdag ettermiddag i siste veke. Det gav i realiteten to arbeidsdagar å få alt heilt på plass, og det er mange som har ytt ekstra i dei åtte barnehagane i Sveio.

– Me hadde på førehand delt barna i grupper og laga fleire treffpunkt, så me var klare! Me er glade i å vera ute uansett vêr, men at me skulle vera så heldige med vêret er heilt fantastisk. Gjensynsgleda var stor både for små og store, og det er godt å vera i gang igjen, seier Vegar Tollaksen, styrar i Læringssenteret Ekrene natur- og gårdsbarnehage.

Viktig å vera trygge

Første dag blei ekstra travel, men veldig kjekk i Sveio barnehage. Dei fleste ungane har vore på lange turar, og dei aller minste skiftar på å vera inne og ute i sine oppsette grupper.

– Det var knallkjekt å treffa igjen barn og foreldre, og me var skikkelig klare til å ta imot på alle måter. Dagen glei supergodt og heilt etter oppsett plan. Det hjalp jo også veldig på med så flott vêr. Det blir nå i starten viktig for oss ansatte å væra trygge, omsorgsfulle og varme vaksne og ikkje visa uro, seier styrar Bente H. Apeland.

Kor lang er ein meter?

Espira Solkroken hadde 56 barn i barnehagen den aller første dagen etter 12. mars. Dette vil sakte, men sikkert auka opp mot totalt 80 barn.
– Det var ein del som var litt flaue og sjenerte om morgonen, men me har også sett stor gjensynsglede. Me har fått herlege spørsmål om kor lang en meter er, og skjønar at foreldra har prata om dette å halda avstand, seier styrar Ruth Vihovde.

Barnehagane har sørga for ein trygg og god oppstart, med gode rutinar i forkant for å begrensa smitte.

– Eg er imponert over personalet vårt som har tatt stort ansvar for å finna gode løysingar, seier Vihovde.

Godt smittevern

– Me var allereie i gang med planleggingsarbeidet sist veke, og hadde sett til den danske planen i starten. Då den norske planen kom, fall alt godt på plass. Den er veldig konkret, og bidrar til at den litt anleise kvardagen blir organisert slik at barnehagane får eit godt smittevern, seier Solfrid Lier Habbestad, kommunalråd skule, barnehage og kultur.

Ho legg til at både barnehagar og skular allereie har erfaring med smittevern sidan det har vore ope for ein del barn og elevar sidan den nasjonale stenginga 12. mars.

Same infomasjon til alle

Kommunen er både barnehageeigar og kommune, og Lier Habbestad seier dialogen har vore tett med alle barnehagane heile veka.

– Som eigar følgjer me ekstra tett opp barnehagane i Sveio, Valestrand og Førde med å få på plass rutinar, og ser til dømes på kva dei treng av utstyr no som det blir meir tid ute. Kommunen sender også ut felles informasjonsskriv til alle foreldra, seier Lier Habbestad.

Dei private barnehagane får same informasjon som dei kommunale, og dei får også informasjonsskriv.

– Dei har sine eigarar, men kan bruka innhaldet slik at det passar inn i deira informasjon, seier Lier Habbestad.