Held E134 stengt minst til onsdag

Det er eit stort og krevjande oppryddingsarbeid som skal til, både i fjellsida og i vegen, før E134 ved Fjæra kan opnast att etter raset. Ei ny vurdering vil bli gjort onsdag.

Det er klart etter at Statens vegvesen sin geolog har gjort ei første vurdering av situasjonen på rasstaden søndag ettermiddag. Dette opplyser Vegvesenet i ei pressemelding klokka 18.41 søndag.

Oppryddingsarbeidet vil ta fleire dagar

— Det står att eit fjellparti høgt oppe i fjellsida som vi må få undersøkt stabiliteten i, seier Svenn Egil Finden, avdelingsdirektør for drift og vedlikehald i Statens vegvesen i pressemeldinga.

— I tillegg må heile det lange og breie skredløpet undersøkast grundig for ytterlegare rasfare. Dersom det blir vurdert som trygt å sende eit klatrelag opp vil det bli gjort nærare undersøkingar av dette partia måndag. Det er eit omfattande arbeid, der sikkerheita til mannskapa våre må stå i høgsetet. Det vi kan seia no er at oppryddingsarbeidet vil ta fleire dagar. På onsdag veit vi meir om når vi kan rekne med å kunne opne vegen, seier Finden.

– Vurder andre ruter

Gjennom søndagen var det vore stor trafikk, ikkje minst på grunn av at det for mange er siste dag i vinterferien. Trafikkdirigentar var ute på fleire trafikknutepunkt for å dirigere og rettleie trafikantane.

— Vi undersøker også moglegheitene for å auke kapasiteten på ferjesambandet Nesvik-Hjelmeland på riksveg 13, seier Svenn Finden.

Finden fortel at situasjonen vil gje utfordringar for trafikkavviklinga så lenge E134 er stengd.

— Vi rår alle trafikantar, ikkje minst tungbilane, til å vurdere andre køyreruter. E18 og E39 om Sørlandet bør vera aktuelt for mange. For trafikken som kjem nordfrå vil det vera mest aktuelt å køyre E16 til Bergen og deretter E39, seier han.

Sjå vegvesen.no/trafikk (175.no) eller appen Vegvesen Trafikk for oppdaterte trafikkmeldingar.