"Innsikter" på plass i Eikeland kapell

– Eg har tatt steg for steg, det har gjort at arbeidet har vore handterleg, seier tekstilkunstnar Karoline Emmerhoff. Tekstilteppet i bakgrunnen har ho gitt namnet «Innsikter». (Foto: Kari Haukås)

Tekstilkunstnar Karoline Emmerhoff har både laga utsmykking og vore konsulent i høve oppussinga av Eikeland kapell. Kapellet skal feira 50-års jubileum 14. november.

Kari Haukås

kari@vestavind-sveio.no

Tekstilteppet er 5 1/5 meter langt og halvannan meter breitt, og går frå tak til golv. Framfor teppet, i fin kontrast til det kvite ullstoffet, heng Kristus-kransen som kunstnaren tidleg bestemte seg for skulle vera med i utsmykkinga.

Det var i slutten av mai 2009 at Karoline Emmerhoff for første gong sette sine bein i kapellet, invitert av leiar i soknerådet, Magnhild Enerstvedt Thorland. Ei eiga jubileumsnemnd med Hilde Økland i spissen var oppnemnd, og Emmerhoff blei spurd til råds. Seinare fekk ho også i oppgåve å laga ei utsmykking til kyrkjerommet.

Det var behov for ei opprydding. Frontveggen framstod som rotete, ein visste liksom ikkje kor ein skulle festa blikket. Dei gjekk blant anna for to lettvegger, ein på kvar side av alterbordet. Resultatet har blitt flott høgdeverknad som understrekar det sakrale. 

Understrekar takhøgda

– Å sjå det ferdige resultatet gav meg ei veldig god kjensle, nå er eg veldig glad, sa kunstnaren då Vestavind trefte henne i kapellet dagen etter at teppet var kome på plass.

Det lange teppet understrekar takhøgda, og er sydd i tre lag ullstoff, pluss innleggsstoff som støttar opp. Teppet har 18 firkanta hol, kvar på 8 x 8 centimeter. Nå gjenstår det å lyssetja arbeidet.

Som søndagsskulelærar var kunstnaren godt kjent med symbolikken i perlene til Kristuskransen.

-– Me kan øva oss i dei verdiane kransen står for, dei er verdt å kjempa for, oppfordrar kunstnaren.

Gode hjelparar

Den største perla i Kristus-kransen er det sveibuen Harry Rød som har dreia. Dei andre 17 perlene er i raudselja og er dreia av Aksel Byrkjeland frå Norheimsund. 

Dekorasjonsmalar Kåre Limseth gav henne ikkje berre gode råd, men tilbudde også ein plass i atelieret sitt i Vedavågen då ho skulle dekorera kulene. 

Karoline Emmerhoff er oppvaksen på Tveit i Sveio, og er nå busett i Haugesund. Ho er utdanna faglærar i forming, men er elles sjølvlært. Tidleg på 1990-talet etablerte ho sitt eige keramikkverkstad, men har elles jobba med mange forskjellig kunstuttrykk opp gjennom åra.

Nå i sluttprosessen er kunstnaren mest opptatt av å takka alle hjelparane som har støtta henne undervegs. Ja, til og med katten hennar har gitt sitt bidrag til arbeidet. 

Til vanleg har pus fri tilgang på stova, men katten har ikkje vore i stova den siste månaden, fortel Emmerhoff som måtte ta heile stova til arbeidsplass då tekstilteppet blei laga.

Sjølve gjennomføringa på teppet tok ein månad.

– Nå har pus fri bane i stova igjen, avsluttar kunstnaren glad.